Assalauma áleykum, húrmetli respublikamız turǵınları hám kásiplesler!
Men, Pirniyazov Parxat Allaniyazovich, Qaraqalpaqstan Respublikası Densawlıqtı saqlaw ministrliginiń Insan resursların rawajlandırıw hám basqarıw sıńarı baslıǵı sıpatında, Ózbekstan Respublikası Prezidenti Shavkat Mirziyoyevtiń 2025-jıl 26-dekabr kúni Oliy Majliske hám Ózbekstan xalqına jollaǵan Múrájatında belgilep berilgen tiykarǵı wazıypalar, atap aytqanda, korrupciyaǵa qarsı gúresiw máseleleri boyınsha berilgen tapsırmalardıń orınlanıwın támiyinlewge, korrupciyaǵa qarsı turaqlı bolıwǵa wáde beremen.
Mámleketimiz basshısınıń atap ótkenindey, korrupciya – mámleket hám jámiyettiń rawajlanıwına úlken tosqınlıq bolıp, ol xalqımızdıń ádillikke, nızam ústinligine hám mámleketlik uyımlarǵa bolǵan isenimine zıyan jetkeredi. Korrupciyaǵa jol qoyıw bolsa – mámleketimizde alıp barıp atırǵan reformalarımızǵa qıyanet esaplanadı.
Bul illetke qarsı gúresiw boyınsha 2026-jılda “ayrıqsha jaǵday” járiyalanǵanlıǵın hár birimiz itibarǵa alıwımız kerek.
Keyingi jıllarda mámleketimizde, sonıń ishinde, densawlıqtı saqlaw sistemasında korrupciyanı saplastırıw, ashıq-aydınlıqtı támiyinlew baǵdarında sistemalı jumıslar ámelge asırılmaqta. Sonıń ishinde, 2025-jıl 21-apreldegi 147-sanlı Prezident qararı menen tastıyıqlanǵan “Korrupciyadan jıraq 5 taraw” baǵdarlaması sheńberinde densawlıqtı saqlaw sistemasın korrupciyadan jıraq taraw sıpatında qáliplestiriw wazıypası qoyıldı.
Biz, Qaraqalpaqstan Respublikası Densawlıqtı saqlaw ministrligi jámááti, usı wazıypalardıń orınlanıwın támiyinlew maqsetinde tómendegi ámeliy jumıslardı izbe-iz alıp barmaqtamız: Respublikamız hám basqada qala hám rayon turǵınları!- egerde ministrlik sistemasındaǵı emlew mekemelerge bos jumıs orınlarına jumısqa kirmekshi bolsaǹız, Ózbekstan Respublikası Densawlıqtı saqlaw ministrliginiń 2025-jıl 28-iyuldaǵı 234-sanlı hám Qaraqalpaqstan Respublikası Densawlıqtı saqlaw ministrliginiń 2025-jıl 8-avgust kúngi 176-sanlı «Qaraqalpaqstan Respublikası densawlıqtı saqlaw ministrligi hám Tashkent qalası densawlıqtı saqlaw basqarmaları rayon (qala) medicinalıq birlespeleri hámde wálayat dárejesindegi mámleketlik medicinalıq hám emlew-profilaktika mekemeleri, hákimshilik basqarıw, shıpakerlik hám orta medicina xızmetkerleriniń bos vakant lawazımlarǵa tańlaw ótkeriw sistemasın jánede jedellestiriw tuwralı» buyrıǵına tiykarlanıp, my.mehnat.uz, vacancy.gov.uz saytlarına jayġastırılıp barılatuġın vakansiya boyınsha jumıs qarap kỏrip, qánigeligiǹiz boyınsha arza tapsırıp, belgilengen basqıshlardan joqarı nátiyje menen ỏtseǹiz jumıs penen támiynlenetuġınlıġıǹızdı esletip ỏtemen.
Eger, Qaraqalpaqstan Respublikası densawlıqtı saqlaw ministrligi sistemasındaǵı emlew mekemelerinde korrupciya menen baylanıslı jaǵdaylarǵa dus kelseńiz, kimlerdur tanıs bilisler arqalı jumısqa kirgizip beremen dep aldawshılıq penen shuġıllansa biypárwa bolmań hám tómendegi isenim telefonlarına xabarlasıń:
Qaraqalpaqstan Respublikası densawlıqtı saqlaw ministrligi
✅ isenim telefonı nomeri: (61) 226-00-48, 1203
Biz korrupciyaǵa birgelikte qarsı turamız!
