Húrmetli kásiplesler! Áziz watanlaslar!
Korrupciya – mámleket hám jámiyet ushın úlken qáwip. Sonlıqtan elimizde barlıq tarawlar qatarında densawlıqtı saqlaw sistemasında da bul illetke qarsı keskin hám mawasasız gúresiw, hár qıylı byurokratiyalıq jáne insan faktorı menen baylanıslı jaǵdaylardı saplastırıwǵa qaratılǵan keń kólemli ilajlar ámelge asırılmaqta.
Álbette, jámiyetshiliktiń belsene qatnasıwısız hám watanlaslarımızdıń járdemisiz bul maqset hám sheklerge erisiw, medicinanı korrupciyadan jıraq, tolıq xalıqshıl sistemaǵa aylandırıw qıyın. Sol sebepli bul baǵdardaǵı háreketlerimizdi birlestiriw hám óz-ara birge islesiwde óz sheshimin kútip turǵan awır mashqalalarımızdı iyinles turıp, nátiyjeli sheshiw boyınsha Sizlerge múrájat etpektemen!
Prezidentimiz 2025-jıl 26-dekabrde Oliy Majlis hám xalqımızǵa Múrájatında korrupciya jámiette isenim ortalıǵın izden shıǵaratuǵın qáwip ekenin atap ótip, 2026-jıl oǵan qarsı gúresiwde “ayrıqsha jaǵday” járiyalanatuǵının málim etken edi.
Búgin tarawdaǵı jetiskenlikti – jetiskenlik, kemshilikti – kemshilik, dep aytıp, sistemadaǵı “kesellikler”ge durıs diagnoz qoyıp, olardıń emin tabıwǵa birgelikte háreket etiwimiz zárúr.
Biraq, tilekke qarsı, elege shekem densawlıqtı saqlaw mákemelerinde korrupciya, byurokratiya, dámegóylik, mápler soqlıǵısıwı sıyaqlı ayırım unamsız jaǵdaylar saqlanıp qalmaqta. Bul bolsa sistemadaǵı reformalardıń nátiyjeliligine zıyan jetkerip, xalqımızdıń medicinaǵa, pidayı qánigelerimizdiń miynetine bolǵan isenimin tómenletpekte.
Áne usı jaǵdaylardan kelip shıǵıp, sistemada korrupciyaǵa qarsı gúresiwdiń zamanagóy mexanizmlerin keńnen engiziwge ayrıqsha itibar qaratıp atırmız. Tarawda ashıq-aydınlıqtı támiyinlew, jámiyetshilik aldında esap beriwdi arttırıw boyınsha zárúr ilajlar kórilmekte.
Atap aytqanda, qısqa waqıt ishinde bir qatar elektron modullerdi ózinde jámlegen Birden-bir medicinalıq málimleme sisteması (DMED) jaratılıp, ámeliyatqa engizilmekte.
Óz gezeginde, taraw basshı-kadrları búgingi kúnniń talaplarınan kelip shıǵıp, zamanagóy menedjment tiykarları boyınsha oqıtılmaqta. Medicina mákemeleri esapshılarınıń finanslıq bilim hám kónlikpelerin arttırıw boyınsha oqıw kursları shólkemlestirilmekte.
Álbette, bul ele jeterli emes. Aldımızda óz sheshimin kútip turǵan mashqalalar, mámleketimiz basshısı aldımızǵa qoyǵan talap hám wazıypalar kóp. Bunı tolıq ámelge asırıw ushın barlıq watanlaslarımız birlesip gúresiwi zárúr.
Óz antına, kásibi hám wazıypasına sadıq, hadal, hújdanı pák Siz, áziz medicina xızmetkerlerin bunnan bılay da medicinanı korrupciyadan jıraq sistemaǵa aylandırıw jolında bar bilim hám tájiriybeńizdi jumsaysız, dep isenemen.
Sonıń menen birge, tarawda korrupciyaǵa qarsı nátiyjeli gúresiwde keń jámiyeshiliktiń járdemi hám qatnasıwı áhmiyetli, dep bilemiz.
Húrmetli puqaralar!
Ministrliktiń oraylıq apparatı, rayonlıq birlespeleri, sistema shólkemleri hám mákemeleri xızmetkerleriniń korrupciyalıq háreketlerine gúwa bolsańız yamasa nızamshılıqqa qayshı basqa huqıqbuzarlıq jaǵdaylarına baylanıslılıǵı boyınsha maǵlıwmatqa iye bolsańız, ministrliktiń “1003” qısqa sanlı “Isenim telefonı” hámde https://t.me/qrdsmbot rásmiy telegram botı arqalı óz múrájatıńızdı jollasańız boladı.
Usı jerde, tek ǵana korrupciyalıq jaǵdaylardı saplastırıw emes, al tarawdı jáne de jetilistiriwde Siziń pikir-usınıslarıńız biz ushın oǵada áhmiyetli ekenin jáne bir márte esletip ótpekshimen. Hár bir múrájat Densawlıqtı saqlaw ministrligi tárepinen qısqa múddetlerde kórip shıǵılıp, zárúr ámeliy ilajlar kóriletuǵının málim etemen.
Murad Kurbanov
Qaraqalpaqstan Respublikası
Densawlıqtı saqlaw ministri
