Qaraqalpaqstan Respublikası Densawlıqtı saqlaw ministrliginde sistemada korrupciya jaǵdayların erte anıqlaw, olardıń aldın alıw hám bul jaǵdaylarǵa sebep bolıp atırǵan faktorlardı saplastırıw máselelerine baǵıshlanǵan keńeytilgen májilis bolıp ótti. Májilis Qaraqalpaqstan Respublikası Densawlıqtı saqlaw ministri M.Qurbanovtıń basshılıǵında ótkerildi.
Onda ministrdiń orınbasarları, ministrliktiń korrupciyaǵa qarsı ishki qadaǵalaw bóliminiń qánigeleri, strukturalıq bólimlerdiń basshıları, juwapker xızmetkerler hám aymaqlıq medicina mákemeleriniń basshıları qatnastı.
Kún tártibine muwapıq, densawlıqtı saqlaw sistemasında korrupciyanıń aldın alıw, bar jaǵdaylardı anıqlaw hám olarǵa imkaniyat jaratıp atırǵan sebep hám sharayatlardı saplastırıw máseleleri hár tárepleme dodalandı.
Májiliste shıǵıp sóylegen ministr M.Kurbanov tarawda korrupciyaǵa qarsı gúresiw baǵdarında bir qatar jumıslar ámelge asırılıp atırǵan bolsa da, ayırım jaǵdaylarda mápler soqlıǵısıwı hám korrupciyalıq jaǵdaylar elege shekem ushırasıp atırǵanın, bul bolsa puqaralardıń haqılı narazılıqlarına sebep bolıp atırǵanın atap ótti.
Sonday-aq, mámleketimiz basshısı tárepinen 2026-jıl korrupciyaǵa qarsı gúresiwde “ayrıqsha jaǵday” dep járiyalanǵanı bul baǵdarda barlıq dárejedegi basshılarǵa jáne de úlken juwapkershilik júkleytuǵını atap ótildi. Májilis dawamında Korrupciyaǵa qarsı ishki qadaǵalaw bóliminiń Qaraqalpaqstan Respublikası boyınsha bas qánigesi R.Nurımbetov ta shıǵıp sóylep, aymaqta korrupciyalıq jaǵdaylardı anıqlaw hám olarǵa qatań ilajlar kórilip atırǵanın bildirip, barlıq basshılardı hár qanday nızamsız háreketlerge mawasasız qatnasta bolıwǵa shaqırdı.
Dodalawlar juwmaǵında juwapkerlerge sistemada ashıq-aydınlıqtı támiyinlew, korrupciya qáwip-qáterlerin azaytıw, puqaralardıń múrájatları menen islesiwdi bunnan bılay da jetilistiriw hám profilaktikalıq ilajlardı kúsheytiw boyınsha anıq tapsırmalar berildi. Sonday-aq, korrupciyaǵa qarsı gúresiw baǵdarında hár bir basshınıń jeke juwapkershiligi ayrıqsha atap ótilip, belgilengen wazıypalardıń orınlanıwın qatań qadaǵalawǵa alıw zárúr ekenligi atap ótildi.
