QR densawlıqtı saqlaw ministrligi tárepinen huqıq-qorǵawdı bekkemlew, nızamshılıqtı támiyinlew, ásirese korrupciyanıń hár qanday kórinisleriniń aldın alıw máselelerine baǵıshlanǵan májilisler ótkerilmekte.

Usınday ilajlardan biri Respublikalıq qıstawlı medicinalıq járdem orayı Qaraqalpaqstan Respublikası filialında shólkemlestirilip, filial direktorı I.Nurımbetov kiris sózinde sistemada nızambuzıwshılıqlardı, ásirese korrupciyalıq háreketlerdiń aldın alıw oǵada áhmiyetli ekenligin atap ótti. – Korrupciya jámiyettiń rawajlanıwına tosqınlıq etiwshi qáwipli illet bolıp, onıń unamsız aqıbetleri bárshemizge belgili,-dedi ol.

– Sonlıqtan medicina sistemasında bul mashqalaǵa qarsı keskin hám mawasasız gúresiw, tarawda ashıq-aydınlıqtı támiyinlew, korrupciyalıq qáwip-qáterlerdi erte anıqlaw hám olarǵa jol qoymaw, hár qıylı byurokratiyalıq tosqınlıqlardı saplastırıw boyınsha bir qatar ilajlar ámelge asırılmaqta.

Respublikalıq Densawlıqtı saqlaw ministrligi Korrupciyaǵa qarsı ishki qadaǵalaw bóliminiń Qaraqalpaqstan Respublikası boyınsha bas qánigesi R.Nurımbetov medicina sistemasındaǵı búgingi jaǵday boyınsha bayanat jasadı.

– Korrupciyanıń hár qanday kórinisi tarawdıń rawajlanıwına úlken tosqınlıq bolıp esaplanadı. Sol sebepli bul illetke qarsı keskin ilajlar kórilip kelinbekte. Respublikamızda da házirgi waqıtta oǵan qarsı mawasasız gúres alıp barılmaqta. Biraq ele kútilgen nátiyjege erisilgeni joq. Ayırım emlew-profilaktika mákemelerinde nızambuzıwshılıqtıń bul kórinisi geyde ushırasıp atır. Xızmetkerlerdiń huqıqıy sawatlılıǵın arttırıw, sistemada nızam ústinligin támiyinlew zárúr. Keleshekte bul baǵdardaǵı profilaktikalıq, úgit-násiyatlaw jumısları jáne de kúsheytiledi. Medicinanı korrupciyadan jıraq tarawǵa aylandırıwǵa qaratılǵan háreketler izbe-iz dawam ettiriledi,-dedi, Respublikalıq Densawlıqtı saqlaw ministrligi Korrupciyaǵa qarsı ishki qadaǵalaw bóliminiń Qaraqalpaqstan Respublikası boyınsha bas qánigesi R.Nurımbetov.

Сондай-ақ, министрлик тәрепинен дүзилген исши топар тәрепинен filialdıń jumısı da úyrenildi. Process dawamında medicinalıq xızmetlerdiń sapası, dári quralları hám medicinalıq buyımlardan maqsetli paydalanıw, medicinalıq úskeneler menen támiyinlengenlik, nawqaslardıń múrájatları menen islesiw hám basqa da áhmiyetli baǵdarlar analizlendi.

Úyreniw juwmaqları boyınsha anıqlanǵan máseleler boyınsha tiyisli usınıslar islep shıǵılatuǵını belgilendi.