Medicina tarawında korrupciyanıń aldın alıw, tarawda ashıq-aydınlıq hám nızamlılıqtı támiyinlew maqsetinde Respublikalıq qánigelestirilgen ruwxıy salamatlıq ilimiy-ámeliy medicina orayınıń psixiatriya xızmeti boyınsha Qaraqalpaqstan Respublikası filialında “Medicina tarawında korrupciyalıq jınayatlardıń kelip shıǵıw faktorları hám juwapkershilik máseleleri, kadrlar korrupciyası hám onı saplastırıw mexanizmleri, korrupciyalıq jınayatlardıń aldın alıw formaları hám tiykarǵı baǵdarları” atamasında seminar shólkemlestirildi.
Ilajda Respublikalıq Densawlıqtı saqlaw ministrligi Korrupciyaǵa qarsı ishki qadaǵalaw bóliminiń Qaraqalpaqstan Respublikası boyınsha bas qánigesi R.I.Nurımbetov tárepinen medicina tarawında ushırasıp atırǵan korrupciyalıq jaǵdaylardıń sebepleri, olardıń unamsız aqıbetleri hám nızamshılıqta belgilengen juwapkershilik ilajları haqqında tolıq maǵlıwmat berildi.
Sonday-aq, kadrlardı jumısqa qabıl etiw hám lawazımlarǵa tayınlaw processlerinde ashıq-aydınlıq hám ádillik principlerin támiyinlew, mápler soqlıǵısıwınıń aldın alıw jáne zamanagóy kompleans qadaǵalaw sistemaların engiziw máseleleri dodalandı.
Qánigeler tárepinen korrupciyaǵa qarsı gúresiwde sanlastırıw, elektron sistemalardı keńnen engiziw, jámiyetlik qadaǵalawdı kúsheytiw hám xızmetkerlerdiń huqıqıy mádeniyatın arttırıw áhmiyetli faktor ekeni atap ótildi.
Ilaj juwmaǵında qatnasıwshılar tárepinen tarawda ashıq-aydınlıqtı támiyinlew, hadallıq principlerin bekkemlew hám korrupciyalıq jınayatlardıń aldın alıw boyınsha pikir-usınıslar bildirildi.
