14-iyun – Xalıqaralıq donorlar kúni múnásibeti menen Respublikaliq qan quyıw stanciyasında biyǵárez donorlıq háreketin bunnan bılay da rawajlandırıw, xalıq arasında qan tapsırıw mádeniyatın keńnen úgit-násiyatlaw, qan hám onıń quramlıq bóleklerine mútájligi bar nawqaslardı qáwipsiz qan ónimleri menen támiyinlew maqsetinde keń kólemli ruwxıy-aǵartıwshılıq hám úgit-násiyatlaw ilajı shólkemlestirildi.

Bul ilaj “Bir tamshı adamgershilik. Qan tapsırıń. Ómirdi saqlap qalıń!” súreni astında ótkerilip, insanıylıq, qayırqomlıq, miyrim-shápáát hám sociallıq juwapkershilik sıyaqlı jaqsı qádiriyatlardı keńnen úgit-násiyatlawǵa xızmet etedi. Donorlıq háreketi mıńlaǵan insanlardıń ómirin saqlap qalıwda úlken áhmiyetke iye bolıp, ásirese, quramalı operaciyalar, awır jaraqatlar, onkologiyalıq kesellikler, qan kesellikleri hám ayrıqsha jaǵdaylarda nawqaslar ushın teńsiz járdem esaplanadı.

Ilajda Qaraqalpaqstan Respublikası Densawlıqtı saqlaw ministrligi, Mádeniyat ministrligi, Ózbekstan densawlıqtı saqlaw xızmetkerleri kásiplik awqamı Respublikalıq keńesiniń Qaraqalpaqstan Respublikası bólimi, Ózbekstan Respublikası “Shıpakerler associaciyası” Qaraqalpaqstan filialı, Jaslar isleri agentligi, Respublikalıq qan quyıw stanciyası, medicina tarawı qánigeleri, úlgili biyǵárez donorlar, jaslar hám keń jámiyetshilik wákilleri qatnastı.

Ilajda shıǵıp sóylewshiler biyǵárez donorlıqtı rawajlandırıw jolındaǵı belsendilerdi qızǵın qutlıqlap, bir neshe jıllar dawamında  qan  tapsırıp  kiyatırǵan  biyǵárez  donorlar hám biyǵárez  donorlıqtı rawajlandırıw jolındaǵı belsendiler xoshametlendi.

Ilajdıń tiykarǵı maqseti – jámiyette biyǵárez donorlıq ideyaların ǵalaba en jaydırıw, jaslardı donorlıq háreketine keńnen tartıw, xalıq arasında qan tapsırıwdıń áhmieti haqqında túsindiriw jumısların kúsheytiw, sonday-aq, óziniń insanıylıq minnetin orınlap kiyatırǵan úlgili donorlar hám jámietlik belsendilerdi tán alıwdan ibarat.

Ilaj mádeniyat xizmetkerleri tárepinen atqarılǵan yoshlı koncert baǵdarlamaları menen dawam etti.

Xalıqaralıq donorlar kúni múnásibeti menen ótkerilip atırǵan bul ilaj tek ǵana donorlarǵa húrmet hám itibardıń kórinisi emes, al hár bir puqaranı insan ómirin saqlap qalıwǵa úles qosıwǵa shaqıratuǵın áhmiyetli sociallıq baslama bolıp esaplanadı.

“Bir tamshı adamgershilik – mıńlaǵan júreklerge ómir baǵıshlaydı!”