Qaraqalpaqstan Respublikasında jumıs alıp barıp atırǵan Respublikalıq qánigelestirilgen ana hám bala salamatlıǵı ilimiy-ámeliy medicina orayınıń Qaraqalpaqstan Respublikası filialında “Ózbekstan – ulıwma úyimiz” ideyası tiykarında diniy keńpeyillikti bekkemlew hám korrupciyaǵa qarsı gúresiw máselelerine baǵıshlanǵan ilaj shólkemlestirildi.
Bul ilaj mámleketimizde alıp barılıp atırǵan izbe-iz reformalar sheńberinde jámiette milletleraralıq tatıwlıqtı bekkemlew, puqaralar arasında óz-ara húrmet hám keńpeyillik mádeniyatın arttırıw, sonday-aq, korrupciyaǵa qarsı gúresiw boyınsha huqıqıy sana hám mádeniyattı arttırıwǵa qaratılǵanı menen ayrıqsha áhmiyetke iye boldı.
Ilajda Mámleketlik qáwipsizlik xızmeti Qaraqalpaqstan Respublikası basqarmasınıń juwaplı xızmetkeri hám Al-Beruniy atındaǵı Islam bilim jurtı direktorınıń orınbasarı Qabıl Mambetov óz bayanatları menen qatnastı.
Bayanachılar tárepinen búgingi kúnde mámleketimizde diniy keńpeyillikti támiyinlew, túrli millet hám konfessiya wákilleri arasında tatıwlıqtı bekkemlew baǵdarında ámelge asırılıp atırǵan sistemalı jumıslar keńnen sáwlelendirip berildi.
Sonıń menen birge, korrupciyaǵa qarsı gúresiw búgingi kúnniń eń áhmiyetli máselelerinen biri ekeni atap ótilip, bul illettiń jámiyetlik rawajlanıwǵa unamsız tásiri, onıń aldın alıwdıń nátiyjeli mexanizmleri, atap aytqanda, ashıq-aydınlıq hám nızam ústinligin támiyinlew arqalı bul baǵdardaǵı jumıslardı jáne de kúsheytiw zárúrligi ayrıqsha atap ótildi.
Ilaj dawamında medicina sistemasında jumıs alıp barıp atırǵan xızmetkerlerdiń kásiplik etikası, hadallıq principlerine ámel etiwi, nawqaslar menen islesiwde juwapkershilik hám adamgershilik sıyaqlı áhmietli tárepler boyınsha da hár tárepleme pikir alısıldı. Bul baǵdarda hár bir xızmetkerdiń jeke juwapkershiligi hám pidayılıǵı áhmiyetli orın ieleytuǵını atap ótildi.
Ilaj juwmaǵında barlıq qatnasıwshılar jámiyette tınıshlıqtı bekkemlew, milletleraralıq tatıwlıq hám diniy keńpeyillikti bunnan bılay da rawajlandırıw, korrupciyaǵa qarsı mawasasız gúresiw jolında birlesiwge shaqırıldı.
