Sońǵı jıllarda Ózbekstan Respublikası hám Izrayl mámleketi Sırtqı isler ministrliginiń «MASHAV» agentligi arasındaǵı birge islesiw jumısları jedel pátler menen rawajlanıp barmaqta.
Asirese agentliktiń medicina tarawındaǵı alıp barıp atırǵan keń kólemli jumısları nátiyjesinde jolǵa qoyılǵan joybarları óziniń unamlı nátiyjesin berip atır.
Usınday joybarlar Qaraqalpaqstandaǵı «Mehirli insanlar» fondı tárepinen ámelge asırılıp, Akademik Yo.H.Twrakulov atındaǵı Respublika qánigelestirilgen endokrinologiya ilimiy-ámeliy medicina orayı Qaraqalpaqstan Respublikası filialı hám Respublika qánigelestirilgen ruwxıy salamatlıq ilimiy-ámeliy medicina orayınıń psixiatriya xızmeti boyınsha Qaraqalpaqstan Respublikası filialına trenajerlar zalı, mektepke shekemgi balalar oyını xanası, mektep jasındaǵı balalar ushın sabaq tayarlaw, súwret salıw xanası, emlew dene mádeniyatı xanası (LFK) kerekli buyımlar menen támiyinlendi.
Agentlikliktiń wákilleri usı medicina mákemelerinde miymanda bolıp, nawqaslarǵa jaratılǵan imkaniyatlar menen tanıstı.
Sonday-aq, óz gezeginde nawqaslar hám olardıń ata-anaları da bul jaratılǵan shárayatlardan kewilleri tolıp, kelgen miymanlarǵa óz minnetdarshılıǵın bildirip ótti.
– Bul jaratılǵan shárayatlar óz gezeginde filialımızda emlenip atırǵan balalardıń tezirek sawalıp ketiwine imkaniyat boladı,-deydi Respublika qánigelestirilgen ruwxıy salamatlıq ilimiy-ámeliy medicina orayınıń psixiatriya xızmeti boyınsha Qaraqalpaqstan Respublikası filialı direktorı Zuxra Palwanova
QR Densawlıqtı saqlaw ministrligi Málimleme xızmeti
Ámeliyatshı
Maryam Ulıqpanova
