Ózbekstan Jurnalistler awqamı Qaraqalpaqstan bólimi hám Respublikalıq Densawlıqtı saqlaw ministrligi tárepinen Xojeli rayonı medicina birlespesinde ǵalaba xabar quralları xızmetkerleri hám blogerler ushın baspasóz ánjumanı ótkerildi.
Onda rayonlıq medicina birlespesiniń baslıǵı Iqlas Palwanov Xojeli rayonında densawlıqtı saqlaw tarawınıń búgingi jaǵdayı, ótken jılı ámelge asırılǵan jumıslar hám jaratılǵan imkaniyatlar haqqında tolıq maǵlıwmatlar berdi.
– Rayonımızda oraylıq emlewxana, kóp tarmaqlı poliklinika hám onıń 4 filialı, 3 shańaraqlıq poliklinika, 6 shańaraqlıq shıpakerlik punktinde aymaq xalqına medicinalıq járdem kórsetilmekte, – deydi birlespe baslıǵı I.Palwanov. – Medicina xızmetkerleriniń waqıt penen esaplaspay, pidákerlik penen miynet etiwi nátiyjesinde, ótken jılı náresteler ólimi azayıp, analar ólimi júz bermedi. Rayonlıq oraylıq emlewxanada 320 stacionar byudjet emlew orınları, bunnan tısqarı 58 tólemli stacionar reabilitaciya orınları jumıs alıp barmaqta. Húrmetli Prezidentimizdiń itibarı menen xalqımız salamatlıǵın bekkemlew maqsetinde, respublikamızdıń barlıq aymaqlarında bolǵanı sıyaqlı, Xojeli rayonında usı jıldıń 3-30-noyabr kúnleri aralıǵında “Salamatlıq marafonı” shólkemlestirildi.
Ótkerilgen marafon sheńberinde shólkemlestirilgen medicinalıq tekseriwler nátiyjesinde, rayonlıq kóp tarmaqlı poliklinikası, onıń 4 filialına, 3 shańaraqlıq poliklinika hám 6 shańaraqlıq shıpakerlik punktine 19573 xalıq múrájat etip, 20986 qabıllaw ámelge asırıldı. Sonıń menen birge, Buxara wálayatı densawlıqtı saqlaw basqarmasına qaraslı emlew-profilaktika mákemeleriniń jetik qánigeleri Xojeli rayonı medicina birlespesinde 2-5-aprel hám 16-20-noyabr kúnleri medicinalıq tekseriwlerdi ámelge asırdı.
2025-jılı emlew-profilaktika mákemeleriniń materiallıq-texnikalıq bazasın jaqsılaw maqsetinde, BMShtıń Rawajlanıw baǵdarlaması joybarı sheńberinde “Taza baza” shańaraqlıq shıpakerlik punkti tolıq rekonstrukciyalandı. Joybardıń ulıwma bahası 74 mıń AQSh dolların quraydı.
Házirgi waqıtta Kulab, Sarıchungil hám Qumbız máhállelerinde jasaytuǵın 6 mıńnan aslam xalıqqa medicina xızmetkerleri tárepinen sapalı medicinalıq xızmetler kórsetilmekte.
Ótkerilgen ilaj dawamında ǵalaba xabar qurallarınıń xızmetkerleri rayonlıq kóp tarmaqlı poliklinikasında alıp barılıp atırǵan jumıslar menen jaqınnan tanısıp, búgingi kúnde keń jámiechilikti qızıqtırıp kiyatırǵan máselelerge juwaplar aldı.
