Búgingi ilim hám texnika joqarı dárejede rawajlanǵan zamanda awıl xojalıǵı, sonıń ishinde, sharwashılıq tarawın hár tárepleme bilimli, jetik kadrlarsız kóz aldımızǵa keltiriwimiz qıyın. Sonlıqtan biziń elimizde sońǵı jılları xalıq xojalıǵınıń barlıq tarawları sıyaqlı, bul tarawdıń da jáne de rawajlanıwına úlken itibar qaratılıp kelinbekte. Usınday itibardıń ayqın bir kórinisi sıpatında, Nókis qalasında Ózbekstan Respublikası Ministrler Kabinetiniń 924–sanlı qararı tiykarında, Samarqand mámleketlik veterinariya medicinası institutı Nókis filialınıń ashılǵanlıǵın aytıp ótsek boladı. -Ózbekstan Respublikası Prezidentiniń 2022-jıl 31-marttaǵı arnawlı qararı menen bul joqarı oqıw ornınıń ataması Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı bolıp ózgertildi, -deydi bizge usı oqıw ornınıń qabıllaw komissiyasınıń juwaplı xatkeri Gúlmurat Xojametov.- Institutımızdıń universitetke aylandırılıwı filialdaǵı oqıw barısına, jańa qánigeliklerdiń ashılıwına tiykar jaratadı. Bunı mámleketlik buyırtpa tiykarında bıyılǵı jılǵı oqıwǵa qabıllaw parametlerinde ayqın kóriwimizge boladı. Atap aytqanda, filialdıń kúndizgi bóliminde jańadan 4, yaǵnıy, buxgalteriya esabı hám audit, zooinjeneriya (qarakólshilik), veterinariya medicinası, veterinariya farmacevtikası, sırtqı tálim túrinde veterinariya farmacevtikası, veterinariya sanitariya ekspertizası qánigelikleri ashıldı. Bul bolsa, sharwashılıq tarawına qızıǵıwshı jaslarǵa jáne de keń imkaniyat beredi. Álbette, Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı joqarıda atı atalǵan qánigeliklerden tısqarı, zooinjeneriya túrler boyınsha, zooinjeneriya jılqıshılıq hám túyeshilik, veterinariya diagnostikası hám laboratoriya isleri boyınsha qánigeliklerine abiturentlerden hújjetler qabıllaydı. Sonıń menen birge filialda, bakalavriat tálim baǵdarın tamamlaǵan, ilimge qızıǵıwshı jaslar ushın bıyılǵı jıldan baslap, jámi 4, yaǵnıy, biotexnologiya (ónim túrleri boyınsha), sharwashılıq, násilshilik, haywanlardıń parazitar hám juqpalı kesellikleri qánigelikleri boyınsha magistratura bólimi ashılǵan. Bul bolsa, respublika húkimeti tárepinen qaraqalpaqstanlı jaslar ushın jaratılıp atırǵan imkaniyatlardıń jáne ayqın kórinisi bolıp tabıladı.
Qaraqalpaqstan xabar agentligi
