Húrmetli medicina xızmetkerleri hám taraw nuranıyları! Xalqımız salamatlıǵı hám iygiligi jolında tınbay xızmet etip atırǵan Siz áziz medicina xızmetkerlerin kásiplik bayramıńız benen Qaraqalpaqstan Respublikası Densawlıqtı saqlaw ministrligi atınan shın júrekten qutlıqlaymız.
Ózbekstan Respublikasınıń 2006-jıl 12-sentyabrdegi «Ózbekstan Respublikası medicina xızmetkerleri kúnin belgilew haqqında»ǵı Nızamına muwapıq, noyabr ayınıń ekinshi ekshembisi Ózbekstan Respublikası Medicina xızmetkerleri kúni dep belgilendi. Rásmiy túrde tastıyıqlanǵan kásiplik bayramımızdıń hár jılı saltanatlı túrde belgileniwi qálbimizdi quwanısh hám maqtanısh sezimlerine toltıradı. Sebebi, bul húkimetimizdiń hám el basshımızdıń xalıq salamatlıǵın saqlaw tarawında xızmet kórsetip atırǵan hár bir medicina xızmetkerleriniń mashaqatlı hám juwapkerli miynetine bolǵan úlken ǵamqorlıǵınıń belgisi.
Mámleketimizde xalıqtıń salamatlıǵın hám ılayıqlı turmıs keshiriwin támiyinlew, analıqtı hám balalıqtı qorǵaw, xalıqqa qıstawlı hám tez járdem xızmetiniń shólkemlestiriliwi, qánigelestirilgen oraylardıń ashılıwı, awıllıq shıpakerlik punktlerdiń qayta dúziliwi hám xızmet kórsetiw sapasınıń jaqsılanıwı, medicinalıq xızmettiń mámleketlik emes tarawınıń jolǵa qoyılıwı, sociallıq áhmiyetke iye keselliklerdi emlewde qolaylı sharayatlar jaratıw, juqpalı keselliklerdi azaytıw hám olarǵa qarsı ilajlardı kúsheytiw, xalıqtıń medicinalıq mádeniyatın hám bilimin asırıw, fizikalıq jaqtan salamat hám ruwxıy bárkamal áwladtı kamal taptırıw, elimizde básekileslikke shıdamlı farmacevtika ónimlerin islep shıǵarıwdı keńeytiw, emlew mákemelerin joqarı texnologiyalıq medicinalıq ásbap-úskeneler menen támiyinlew ushın barlıq zárúrli sharayatlar jaratıldı.
Keń kólemli reformalardıń turmısqa engiziliwi nátiyjesinde densawlıqtı saqlaw sistemasında medicinalıq xızmet kórsetiwdiń aldıńǵı forma hám usılları qáliplesip, bul insan salamatlıǵın bekkemlew, onıń ortasha ómir kóriwin uzaytıw hám turmısınıń sapasın jaqsılawǵa qaratıldı. Ásirese, sońǵı waqıtta bul taraw rawajı ushın islenip atırǵan isler, insanlardıń biybaha baylıǵı bolǵan densawlıǵın asıraw jolındaǵı háreketler medicinada áhmiyetli ózgerisler baslanǵanlıǵınan dárek beredi. Densawlıqtı saqlaw tarawınıń jańa basqıshqa kóteriliwine, tarawdıń materiallıq-texnikalıq bazasınıń elede bekkemlenip, xızmet kórsetiw sapasınıń jaqsılanıwına erisildi. Densawlıqtı saqlaw sistemasın túpkilikli reformalaw boyınsha ámelge asırılıp atırǵan keń kólemli jumıslar hám olardıń nátiyjeleri haqqında ele kóp aytıw múmkin. Jámiyetimiz ushın zárúr bolǵan usınday áhmiyetli bir tarawdı jetilistiriw, zaman talabına say ilgeri adımlaw biz medicina xızmetkerleriniń juwapkershiliginde eken, ózlerińizdiń barlıq bilimińizdi hám tájiriybeńizdi jumsap, bizlerge bildirilgen isenim hám itibardı aqlaytuǵınıńızǵa isenemiz.
Húrmetli kásiplesler! Aldımızdaǵı baslı wazıypalardıń biri — medicinalıq xızmetti jańa sapaǵa kóteriw, onı xalıqqa jaqınlatıw, usı xızmetten paydalanıwdı ápiwayılastırıw hám jetilistiriw bolıp tabıladı. Sizlerdi jáne bir márte kásiplik bayramıńız benen qutlıqlaymız. Xalıq salamatlıǵı jolındaǵı iygilikli islerińizde tabıslar tileymiz. Qálbińiz hámiyshe ústińizdegi aq xalat kibi girbińsiz bolıp, qáste kewillerge quwanısh baǵıshlawda shıpa bergen qollarıńız hasla dárt kórmesin!
Murat Ismailovich Qurbanov, Qaraqalpaqstan Respublikası Densawlıqtı saqlaw ministri
