Ózbekstan Jurnalistler awqamı Qaraqalpaqstan bólimi hám Respublikalıq Densawlıqtı saqlaw ministrligi tárepinen Qaraqalpaqstan Respublikası AIJSqa qarsı gúresiw orayında ǵalaba xabar quralları xızmetkerleri hám blogerler ushın baspasóz ánjumanı ótkerildi.
Onda AIJSqa qarsı gúresiw orayınıń bas shıpakeri J.Madreymova medicina mákemesiniń respublikamızda AIV infekciyasınıń aldın alıw, usı infekciya menen jasaytuǵın shaxslar hám dispanser qadaǵalawına alınǵan nawqaslardıń búgingi jaǵdayı, ótken jılı ámelge asırılǵan jumıslar menen jaratılǵan imkaniyatlar haqqında keń túrde maǵlıwmat berdi.
– “Adamnıń immunitet jetispewshiligi virusı keltirip shıǵaratuǵın kesellik (AIV) tarqalıwına qarsı gúresiw haqqında”ǵı Nızam, Ózbekstan Respublikası Prezidentiniń 2008-jıl 26-dekabrdegi “Ózbekstan Respublikasında AIV infekciyası tarqalıwına baylanıslı qosımsha ilajlar haqqında”ǵı, 2023-jıl 20-yanvardaǵı “Adamnıń immunitet jetispewshiligi virusı keltirip shıǵaratuǵın kesellikke qarsı gúresiw sistemasın bunnan bılay da kúsheytiw ilajları haqqında”ǵı qararları, Ózbekstan Respublikası Ministrler Kabinetiniń 2009-jıl 5-yanvardaǵı “AIVǵa qarsı gúresiw oraylarınıń shólkemlestiriwshilik strukturası hám jumısın jetilistiriw ilajları haqqında”ǵı qararınıń orınlanıwın támiyinlew boyınsha Qaraqalpaqstan Respublikasında epidemiyalıq jaǵdaydıń turaqlılıǵına erisiw, AIV/AIV profilaktikası, AIV AIV infekciyasınıń emlewxana ishindegi infekciya kórinisinde tarqalıwınıń hám anadan balaǵa ótiwiniń aldın alıw maqsetinde, orayımızda bir qatar ilajlar ámelge asırılma,- deydi bas shıpaker Djamilya Madreymova.
Orayımızda hám oǵan qaraslı 6 orında rayonlararalıq laboratoriyalar bolıp, olarda 50 shıpaker hám 57 orta arnawlı medicina xızmetkerleri xızmet kórsetip kelmekte. Búgingi kúnde respublikamızda 1145 adam AIV infekciyası menen jasap kelmekte. Bul infekciyanı juqtırǵanlardıń 681 er adamlar, 464 hayal-qızlar quraydı. Rayonlar kesiminde alǵanda, AIV infekciyasın juqtırǵanlardıń sanı, respublikamızdıń qubla rayonları hám Nókis qalasında kópshilikti quraydı. Atap aytqanda, Tórtkúlde 357, Beruniyde 219, Ellikqalada 106, Ámiwdáryada 80 hám Nókis qalasında 162 adam AIV infekciyası menen jasap kelmekte. Tilekke qarsı, ótken jılı 129 adam AIV infekciyasın juqtırıp aldı. Bul kórsetkish 2024-jılı 131 bolǵan edi. Ashınarlı tárepi sonda, kesellik juqtırǵanlardıń kópshiligi bul kesellikti jınısıy jol menen juqtırmaqta.
Ánjumanda oray xızmetkerleri tárepinen alıp barılıp atırǵan emlew-profilaktika jumıslarınıń barısı, laboratoriyalıq tekseriwlerdiń nátiyjesi haqqında qatnasıwshılarǵa keń maǵlıwmatlar berilip, jurnalistler oraydaǵı búgingi turmıs penen jaqınnan tanıstı.
Ilaj dawamında ǵalaba xabar qurallarınıń wákilleri oray basshılarına búgingi kúnde keń jámiyectsilikti qızıqtırıp kiyatırǵan máseleler boyınsha sorawlar berip, olarǵa tiyisli juwaplar aldı.
