Ózbekstan Respublikası Prezidentiniń 2022-jıl 28-yanvardaǵı PP-60-sanlı Pármanı menen tastıyıqlanǵan “2022-2026-jıllarǵa mólsherlengen Jańa Ózbekstannıń rawajlanıw strategiyası”nda denetárbiya hám sport penen turaqlı shuǵıllanıwshılardıń sanın kóbeytiw, densawlıqtı saqlaw shólkemleri xızmetkerlerin sport ilajlarına keńnen qamtıp alıw, olar arasında jarıslar shólkemlestiriw, xızmetkerlerdiń fizikalıq belsendiligin arttırıw belgilengen.
Ózbekstan kásiplik awqamları Federaciyasınıń Qaraqalpaqstan Keńesi, Qaraqalpaqstan Respublikası Densawlıqtı saqlaw ministrligi, Qaraqalpaqstan Respublikası Sport ministrligi hám Ózbekstan Jaslar isleri agentligi Qaraqalpaqstan Respublikası basqarması tárepinen tastıyıqlanǵan qospa qararǵa tiykarlanıp, “Bes baslama olimpiadası” sheńberinde Densawlıqtı saqlaw ministrligi sistemasındaǵı xızmetkerler arasında “Salamat denede – sapalı medicina” súreni astında Kásiplik awqamı kubogi sport jarıslarınıń Qaraqalpaqstan Respublikası basqıshı bolıp ótti.
Sport jarısları Nókis qalasındaǵı 1-sanlı sport mektebi, Qaraqalpaqstan medicina institutı, Berdaq atındaǵı Qaraqalpaq mámleketlik universiteti hám Jaslar orayında shólkemlestirildi.
Onda densawlıqtı saqlaw xızmetkerleri mini-futbol, shaxmat, shashka, stol tennisi hám voleybol túrleri boyınsha óz-ara kúsh sınastı.
Oǵada qızıqlı ótken sport jarısları tájiriybeli tóreshiler tárepinen bahalanıp, hár bir sport túrinen jeńimpazlar hám ulıwma komandalıq esapta jeńimpazlar anıqlandı.
Ulıwma komandalıq esapta birinshi orındı ielegen Qońırat rayonı komandasına “Ózbekstan kásiplik awqamları Federaciyası kubogi” hám 30 million sum aqshalay sıylıq tapsırıldı.
Sonday-aq, jeńimpaz komandalarǵa hám túrli nominaciya iyelerine Ózbekstan kásiplik awqamları Federaciyasınıń Qaraqalpaqstan Keńesi tárepinen diplom hám sawǵalar tapsırıldı.
