Qaraqalpaqstan Respublikasında joqarı texnologiyalı medicinalıq xızmetti rawajlandırıw jolında jáne bir áhmiyetli qádem qoyıldı.

U.Xalmuratov atındaǵı Respublikalıq kóp tarmaqlı medicina orayında Akademik V.Vohidov atındaǵı Respublikalıq qánigelestirilgen xirurgiya ilimiy-ámeliy medicina orayınıń tájiriybeli xirurg shıpakerleri hám aymaqlıq qánigeler menen birgelikte birinshi márte kem invazivli laparoskoplıq usılda Ivor Lewis esophagectomy (Lyuis operaciyası) ámeliyatı orınlandı.

Bul joqarı texnologiyalıq xirurgiyalıq usıl qızıl óńeshtiń awır kesellikleri, sonıń ishinde, onkologiyalıq keselliklerdi emlewde qollanıladı. Operaciya eki basqıshta – laparoskopik (qarın boslıǵı arqalı) hám torakoskopik (kókirek quwıslıǵı arqalı) usılda ámelge asırıldı.

Dáslepki bul operaciya 73 jasar hayal nawqasta ámelge asırıldı.

Kem invazivlik qatnasınıń tiykarǵı abzallıqları tómendegilerden ibarat:
• Minimal xirurgiyalıq kesimler.
• Operaciyadan keyingi awırıwdıń kemeyiwi.
• Nawqaslardıń tezirek tikleniwi.
• Asqınıwlar qáwpin azaytıw.

Ilaj sheńberinde Tashkentten kelgen joqarı tájiriybeli qánigeler óz tájiriybeleri menen bólisip, aymaqlıq shıpakerler ushın ámeliy oqıw processlerin de shólkemlestirmekte. Bul bolsa orınlarda medicinalıq xızmet sapasın arttırıw hám joqarı texnologiyalı operaciyalardı aymaqlarda engiziwge xızmet etedi.

Bunday ámeliyatlardıń aymaqlarda jolǵa qoyılıwı “nawqaslardıń uzaǵın jaqın etiw,” yaǵnıy olardıń paytaxtqa barıw zárúrligin azaytıwda úlken áhmiyetke iye.

Operaciyanıń barlıq qárejetleri medicinalıq qamsızlandırıw qorı tárepinen qaplap berildi.

Oray basshıları keleshekte de zamanagóy, kem invazivli texnologiyalardı keńnen engiziw arqalı xalıqqa kórsetilip atırǵan medicinalıq xızmettiń sapasın jáne de arttırıwdı rejelestirgen.