Qaraqalpaqstan Respublikası Ministrler Keńesiniń jumıs rejesine muwapıq, Qaraqalpaqstan Respublikası Densawlıqtı saqlaw ministrligi hám Ellikqala rayonı hákimligi menen birgelikte Ellikqala rayonı medicina birlespesinde ǵalaba xabar quralları wákilleriniń qatnasıwında press-tur shólkemlestirildi.
2026-jıl dawamında Ellikqala rayonı medicina birlespesi tárepinen xalıqqa medicinalıq xızmet kórsetiwdiń sapasın arttırıw, keselliklerdi erte anıqlaw, ana hám bala salamatlıǵın qorǵaw jáne medicina mákemeleriniń materiallıq-texnikalıq bazasın bekkemlew boyınsha bir qatar jumıslar ámelge asırıldı.
Házirgi waqıtta medicina birlespesi quramında 365 orınlıq emlewxana, 1 kóp tarmaqlı poliklinika, 7 shańaraqlıq poliklinika, 6 shańaraqlıq shıpakerlik punkti hám 3 medicinalıq punkt jumıs alıp barıp, 171 881 xalıqqa xızmet kórsetpekte.
Esap beriw dáwirinde 116 542 xalıq profilaktikalıq medicinalıq tekseriwden ótkerildi, 15 kóshpeli medicinalıq tekseriw shólkemlestirildi. Hámiledarlıq boyınsha 3 034 hayal esapqa alındı, 34 587 bala patronaj menen qamtıp alındı. Emlewge qamtıp alıw 99 procentti quradı.
Medicinalıq birlespede jámi 1 651 xızmetker miynet etpekte. Jıl dawamında medicinalıq úskeneler satıp alıw ushın 4 milliard sumnan aslam qarjı qaratıldı.
2027-jılı baslanǵısh medicinalıq-sanitariyalıq járdem sistemasın jetilistiriw, 15 shańaraqlıq poliklinika shólkemlestiriw, medicinalıq mákemelerdi ońlaw, mámleketlik-jeke menshik sheriklik tiykarında zamanagóy MSKT apparatın engiziw hám shıpakerlerdiń jetispewshiligin azaytıw rejelestirilgen.
Tiykarǵı maqset — xalıqqa sapalı, zamanagóy hám qánigeli medicinalıq xızmet kórsetiw imkaniyatların jáne de keńeytiwden ibarat.
