Keyingi jılları mámleketimizde Prezidentimizdiń basshılıǵında Korrupciyaǵa qarsı gúresiw baǵdarında bir qatar unamlı jumıslar ámelge asırılmaqta. Mámleketimiz basshısı tárepinen ótkerilgen Korrupciyaǵa qarsı gúresiw boyınsha Milliy keńeste belgilep berilgen wazıypalar sheńberinde “10-noyabr-10-dekabr kúnleri respublikamızda Korrupciyaǵa qarsı gúresiw aylıǵı” dep járiyalandı.
Aylıq sheńberinde elimizdegi densawlıqtı saqlaw shólkemlerinde “Densawlıqtı saqlaw sistemasın “korrupciyasız taraw”ǵa aylandırıw – tiykarǵı wazıypamız!” súreni astında úgit-násiyat ilajları ótkerilmekte.
Usınday aǵartıwshılıq ilaj Nókis qalasındaǵı 8-sanlı shańaraqlıq poliklinikada da ótkerilip, onda Qaraqalpaqstan Respublikası Densawlıqtı saqlaw ministrliginiń juwapker wákilleri, medicina xızmetkerleri hám ǵalaba xabar qurallarınıń wákilleri qatnastı.
Onda Qaraqalpaqstan Respublikası Densawlıqtı saqlaw ministrliginiń bas yuriskonsulti Jienbay Allaniyazov, ministrliktiń Múrájatlar menen islesiw bóliminiń bas qánigesi, tarawda korrupciyaǵa qarsı ishki qadaǵalaw strukturası xızmet wazıypaların atqarıwshı Roza Qaypnazarovalar shıǵıp sóylep, pútkil mámleketimiz boylap ótkerilip atırǵan aylıqtıń áhmiyeti hám bul baǵdarda alıp barılıp atırǵan jumıslar haqqında ilaj qatnasıwshılarına túsinikler berdi.
Bunnan soń ǵalaba xabar qurallarınıń wákilleri ushın poliklinikada press-tur shólkemlestirilip, olar densawlıqtı saqlaw tarawında insan faktorın azaytıw maqsetinde, baslanǵısh medicinalıq xızmetke zamanagóy texnologiyalardı engiziw boyınsha alıp barılıp atırǵan jumıslar menen jaqınnan tanıstı.
– Poliklinikamız Nókis qalasındaǵı 40 mıńnan aslam xalıqqa medicinalıq xızmet kórsetedi, – deydi 8-shańaraqlıq poliklinika bas shıpakeriniń orınbasarı Zulfiya Ismaylova. – 2024-jıldıń 10-fevral kúni jańadan qurılıp paydalanıwǵa tapsırılǵan poliklinikamız barlıq zárúr ásbap-úskeneler menen tolıq támiyinlengen. Ásirese, xalqımız ushın poliklinikamızda D-med elektron baǵdarlamasınıń iske qosılıwı, tarawda qaǵazpazlıqtı azaytıw hám korrupciyanıń aldın alıwda áhmiyetli orın iyelemekte.
Ilaj dawamında jurnalistler taraw xızmetkerlerine sorawlar berip, olarǵa tiyisli juwaplar aldı.
