Qaraqalpaqstan Respublikası Densawlıqtı saqlaw ministrliginiń xalıqaralıq birge islesiw baǵdarında alıp barıp atırǵan ámeliy jumısları nátiyjesinde 2026-jıl 25-iyul kúni Respublikalıq qánigelestirilgen kóz mikroxirurgiyası ilimiy-ámeliy medicina orayınıń Qaraqalpaqstan Respublikası filialında Túrkiyanıń xalıqaralıq Dünyagöz emlewxanasınıń maman qánigeleriniń qatnasıwında xalıq ushın biypul oftalmologiyalıq medicinalıq tekseriw shólkemlestirildi.

Ilaj dawamında túrkiyalı qánigeler tárepinen júzlegen puqaralar qabıl etilip, olarǵa kóz keselliklerin erte anıqlaw, diagnoz qoyıw hám zamanagóy emlew usılları boyınsha maman medicinalıq másláhátler berildi.

Qabıllaw dawamında katarakta, glaukoma, tor perde (retina) kesellikleri, makula patologiyaları, qurǵaq kóz sindromi, diabet hám arterial gipertenziya menen baylanıslı kóz kesellikleri hám basqa oftalmologiyalıq mashqalalar boyınsha tekseriwler ótkerildi.

Bul ilaj Qaraqalpaqstan Respublikası Densawlıqtı saqlaw ministrliginiń xalıqaralıq medicinalıq birge islesiwdi rawajlandırıw, aldınǵı sırt el tájiriybelerin aymaqta engiziw hám xalıqqa kórsetilip atırǵan qánigelestirilgen medicinalıq xızmettiń sapasın bunnan bılay da arttırıw baǵdarındaǵı ámeliy jumıslarınıń ayqın kórinisi boldı.