Sońǵı jılları elimizde densawlıqtı saqlaw sistemasın modernizaciyalaw, medicinalıq mákemelerdi zamanagóy talaplarǵa muwapıq tárizde jańalaw hám shıpakerler ushın qolaylı miynet sharayatların jaratıwǵa ayrıqsha itibar qaratılmaqta.

Usı maqsette Ellikqala rayonındaǵı 2-sanlı Respublikalıq ruwxıy hám nerv kesellikleri dispanseri “Baslamalı byudjet” joybarı arqalı 1,5 milliard sum qarjı utıp alıp, qurılıs – ońlaw jumısları alıp barıldı.  Bul jetiskenlik – máhálle xalqınıń hám jámááttiń belsene qatnasıwı, baslaması jáne pidákerlik miynetiniń nátiyjesi bolıp esaplanadı.

Ońlaw nátiyjesinde imarattıń ishki hám sırtqı kórinisi jańalanıp, zamanagóy kóriniske keltirildi, medicinalıq úskeneler jańalandı hám puqaralarǵa kórsetiletuǵın xızmet sapası jáne de arttırıldı. Búgingi kúnde dispanserde nawqaslar ushın barlıq qolaylıqlar jaratılǵan – tazalıqqa, qolaylı ortalıqqa hám zamanagóy úskenelerge ayrıqsha itibar qaratılǵan. Bul bolsa, álbette, ruwxıy salamatlıq hám nátiyjeli emleniw ushın áhmiyetli faktor esaplanadı.

Usı múnásibet penen búgin rayon hákimi Niyazimbetov Valijan Batırbaevich, Ózbekstan Respublikası Densawlıqtı saqlaw ministrligi Ruwxıy-ámeliy ilimiy orayınıń direktorı, professor Ashurov Zarifjon Sharipovich, Qaraqalpaqstan Respublikası densawlıqtı saqlaw ministriniń birinshi orınbasarı Asqarov Akmal Alisherovich, tiyisli shólkemlerdiń basshıları, ǵalaba xabar quralları wákilleri, dispanser jámááti hám máhálle nuranıyları jańalanǵan mákemeniń jumısı menen tanıstı.

Ilaj dawamında ámelge asırılǵan jumıslar joqarı bahalandı. Atap ótilgenindey, bul dóretiwshilik jumıslar Prezidentimiz tárepinen medicina tarawına qaratılıp atırǵan úlken itibar hám ǵamqorlıqtıń ámeliy kórinisi bolıp esaplanadı.