Qaraqalpaqstan Respublikasında xalıqtıń salamatlıǵın qorǵaw, birlemshi medicinalıq-sanitariyalıq járdem sapasın jáne de jaqsılaw hám medicinalıq xızmetlerdiń nátiyjeliligin arttırıw maqsetinde densawlıqtı saqlaw sistemasında keń kólemli reformalar ámelge asırılmaqta.
Ózbekstan Respublikası Densawlıqtı saqlaw ministriniń 2025-jıl 20-iyundaǵı 175-sanlı buyrıǵı, sonday-aq, Ózbekstan Respublikası Prezidentiniń PP-88-sanlı Pármanı hám PQ-185-sanlı qararında belgilengen wazıypalar tiykarında medicina sistemasın jańa basqıshqa alıp shıǵıwǵa qaratılǵan tiykarǵı baǵdarlar belgilendi.
Bul reformalardıń tiykarǵı maqseti – Shımbay rayonınıń tájiriybesin respublikanıń barlıq qala hám rayonlarında keńnen engiziw, birlemshi medicinalıq-sanitariyalıq járdem sistemasın jetilistiriw, xalıqqa medicinalıq xızmetlerdi jáne de jaqınlastırıw hám olardıń sapasın arttırıwdan ibarat.
Jańa sistema sheńberinde shańaraqlıq shıpakerler hám patronaj miyirbiykeleriniń roli kúsheytilmekte. Keselliklerdi erte anıqlaw, profilaktikalıq ilajlardı keńeytiw, sozılmalı kesellikler qadaǵalawın jetilistiriw hám salamat turmıs tárizin úgit-násiyatlawǵa ayrıqsha itibar qaratılmaqta. Bul bolsa xalıqtıń salamatlıǵın saqlaw hám keselliklerdiń aldın alıwda áhmiyetli faktor bolıp xızmet etedi.
Sonday-aq, densawlıqtı saqlaw sistemasında sanlı texnologiyalardı keńnen engiziw boyınsha izbe-iz jumıslar alıp barılmaqta. Atap aytqanda, “Elektron poliklinika” hám “Elektron emlewxana” málimleme sistemaları ámeliyatqa engizilip, medicinalıq xızmetlerdi basqarıw, nawqaslar maǵlıwmatların júrgiziw hám xızmetlerdiń sapası ústinen qadaǵalawdı kúsheytiw imkaniyatları keńeymekte.
Aymaqlardaǵı medicina mákemeleriniń materiallıq-texnikalıq bazasın bekkemlew, olardı zamanagóy diagnostika hám emlew úskeneleri menen támiyinlew, medicina xızmetkerleriniń kásiplik mamanlıǵın turaqlı arttırıw boyınsha sistemalı ilajlar kórilmekte. Ásirese, shetki hám alıs aymaqlarda jasaytuǵın puqaralardıń sapalı medicinalıq xızmetlerden paydalanıw imkaniyatların keńeytiwge ayrıqsha itibar qaratılmaqta.
Mámleketlik medicinalıq qamsızlandırıw sistemasın basqıshpa-basqısh engiziw arqalı xalıqqa kepillengen medicinalıq xızmetler kórsetiw, qarjılandırıwdıń zamanagóy mexanizmlerin engiziw hám medicinalıq xızmetlerdiń nátiyjeliligin arttırıw da reformalardıń áhmiyetli baǵdarlarınan biri bolıp esaplanadı.
Ámelge asırılıp atırǵan ilajlar nátiyjesinde densawlıqtı saqlaw sistemasınıń turaqlı rawajlanıwı, xalıqtıń sapalı hám zamanagóy medicinalıq xızmetlerden paydalanıw imkaniyatlarınıń keńeyiwi, medicinalıq járdemniń qolaylılıǵı hám ashıq-aydınlıǵı támiyinleniwi jáne xalıqtıń salamatlıǵın bekkemlewge erisiliwi kútilmekte.
Qaraqalpaqstan Respublikası Densawlıqtı saqlaw ministrligi Málimleme xızmeti.
