Qaraqalpaqstan Respublikası Densawlıqtı saqlaw ministrligi tárepinen “Doslıq úyi”nde “Grant jazıw hám jeńip alıw” atamasında seminar ótkerildi.
Onda ministrlik quramındaǵı barlıq emlew profilaktikalıq mákemeleriniń, qalalıq hám rayonlıq medicina birlespeleriniń xızmetkerleri qatnastı.
Seminarda “Grant park”tiń grant penen islesiw sektorınıń qánigesi G.Nurnazarova, Qaraqalpaqstan Respublikası Densawlıqtı saqlaw ministrliginiń investiciyalardı tartıw hám mámleketlik-jeke menshik sheriklik hám aucorsingti rawajlandırıw sektorınıń bas qánigesi Z.Palwaniyazova xalıqaralıq hám jergilikli grant joybarlarında qatnasıw hám jeńip alıw usılları haqqında maǵlıwmatlar berdi.
– Xalıqaralıq shólkemlerdiń grantların alıwda hár qıylı baslama hám joybarlardı qollap-quwatlaw maqsetinde shólkemlestirilgen jańa “Grand Park” joybarın tanıstırıp atırǵanımızdan quwanıshlımız, – deydi Respublikalıq balalar reabilitaciya orayınıń shıpakeri Zulfiya Doshekenova.
Joybardıń maqseti – grant alıw procesinde másláhátler beriw, arza tayarlawda járdemlesiw hám qollap-quwatlaw arqalı jedel hám perspektivalı joybarlardı jańa basqıshqa kóteriwge járdemlesiw bolıp esaplanadı. Bul joybar Qaraqalpaqstan Respublikası Joqarǵı Keńesiniń járdeminde ámelge asırılıp atırǵanı onıń áhmietli hám isenimli ekenin kórsetedi.
Grand Park innovaciyalıq ideyalar rawajlanatuǵın, qábiletli insanlar óz maqsetlerin ámelge asıra alatuǵın maydanǵa aylanatuǵınına isenemiz.
Ilajda qatnasıwshılarǵa tiykarınan xalıqaralıq grantlardı izlew hám tartıw, grantlar ushın buyırtpalar tayarlaw hám tapsırıw, grant joybarların muwapıqlastırıw hám basqarıw, qarjı, esap-sanaq hám grantlar boyınsha esabat tapsırıw, grant joybarlarınıń nátiyjeliligin monitoring etiw hám bahalaw, xalıqaralıq donorlar hám sherikler menen óz-ara baylanıs máseleleri boyınsha túsinikler berildi.
Семинар даўамында қатнасыўшылар өзлерин қызықтырған сораўларға жуўап алды.
