Nókis qalasındaǵı 27-kishi rayon aymaǵında jaylasqan kóp qabatlı imaratlardıń birinde “KARIMOV” klinikasınıń ashılıw máresimi bolıp ótti. Onda Qaraqalpaqstan Respublikası Densawlıqtı saqlaw ministri M.Qurbanov, densawlıqtı saqlaw tarawınıń juwapker qánigeleri, keń jámiechilik wákilleri, aymaq turǵınları qatnastı.
Onda atap ótilgenindey, búgingi kúnde adamlar farmacevtika biznesiniń qurbanı hám nıshanı bolmawı ushın medicinanıń neyrokineziologiya baǵdarı turmısımızǵa kirip kelmekte hám bul boyınsha qánigeler jetilisip shıqpaqta. Xalıq medicinasına jaqın bul tarawdan nawqaslar kóbirek maǵlıwmatqa iye bolsa dártlerine dawa tawıp, dárisiz emleniw imkaniyatına iye boladı.
Kineziologiya – bul latın tilindegi sóz bolip, bizińshe “háreket” degen mánisti beredi. Jaqın jıllardan berli Ózbekstan Respublikasına da bul taraw kirip kelmekte.
Adamlardıń reabilitaciyalıq jaǵdayın, denesindegi háreketlerdi yamasa neyrodinamikasın óz halına qaytarıw ushın tez tásir kúshin kórsetetuǵın, yaǵnıy, adam uzaq waqıtlar dawamında emlenbesten, tez arada háreketleniwin qayta tiklep beriwin úyretetuǵın ilim esaplanadı.
-Bul usıl birinshi márte 963-964-jılları Amerikada rawajlana baslagan. Keyin Evropa mámleketlerinde, Rossiyada rawajlangan. Portugaliyanıń Portu qalasındaǵı medicina universiteti hám Germaniyanıń Gannover qalasındaǵı neyrokineziologiya universitetinde de bul taraw boyınsha jumıslarımızdı rawajlandırmaqtamız. Jıllar dawamında sozılmalı bolıp kelgen nawqaslardı tez waqıt ishinde emlew biziń tiykarǵı wazıypamız. Klinikamızda maman qánigeler tárepinen zamanagóy medicinalıq úskenelerde hár tárepleme sapalı medicinalıq xızmetler kórsetiledi. Házirshe filialda ózimiz tayarlaǵan shákirtler jumıs alıp baradı. Biraq keyin ala bul jerde de jergilikli qánigelerdi tayarlap shıǵarıp, jumıs orınların jaratıw maqsetimiz bar, – deydi “KARIMOV” klinikasınıń tiykarın salıwshısı, neyrokineziolog shıpaker S.Karimov.
Ilajda qatnasıwshılar klinikadaǵı sharayatlar menen tanısıp, ózlerin qızıqtırǵan maǵlıwmatlarǵa iye boldı.
Qaraqalpaqstan Respublikası Densawlıqtı saqlaw ministrligi Málimleme xızmeti
