Koreya Xalıqaralıq densawlıqtı saqlaw fondı (KOFIH)nıń shólkemlestiriwinde usı jıldıń 16-20-fevral kúnleri Yonsey universiteti wákillerinen dúzilgen delegaciyanıń Ózbekstanǵa saparı rejelestirilgen bolıp, usı delegaciya aǵzaları menen Qaraqalpaqstan Respublikası Densawlıqtı saqlaw ministrliginde ushırasıw shólkemlestirildi.
Bul ilaj Densawlıqtı saqlaw ministrligi hám KOFIH arasındaǵı 2024-2027-jıllarǵa arnalǵan Ózbekstan Respublikasında emlewxanaǵa shekemgi bolǵan qıstawlı medicinalıq járdem potencialın bekkemlew joybarı sheńberinde ámelge asırılmaqta.
Maqset – medicina xızmetkerlerine bolǵan zárúrlikti bahalaw hám qıstawlı hám tez medicinalıq járdem sistemasın rawajlandırıw boyınsha konsalting joybarın baslawǵa tayarlanıwdan ibarat.
Ushırasıwda usı máseleler dodalanıp, ámeliy járdem beriw boyınsha ilajlar kelisip alındı.
Sonday-aq, delegaciya aǵzaları Respublikalıq qıstawlı medicinalıq járdem ilimiy orayı Qaraqalpaqstan filialı hám Respublikalıq tez medicinalıq járdem orayı Qaraqalpaqstan filialında bolıp, shárayatlar menen tanıstı.
Qaraqalpaqstan Respublikası Densawlıqtı saqlaw ministrligi
Málimleme xızmeti
