Húrmetli Prezidentimizdiń usı jıldıń 19-may kúni «Respublikada densawlıqtı saqlaw sistemasın hám xalıqqa medicinalıq xızmet kórsetiw principlerin jetilistiriw arqalı tarawdı reformalawdı izbe-iz dawam ettiriw ilajları haqqında»ǵı pármanı qabıl etilgen edi.
Pármanǵa bola, xalıqqa medicinalıq xızmet kórsetiwdiń zamanagóy, nátiyjeli hám xalıqshıl sistemasın engiziw maqsetinde densawlıqtı saqlaw tarawın túp-tiykarınan jetilistiriw názerde tutılǵan. Pármanda belgilengen tiykarǵı maqsetlerden biri – xalıqaralıq tájiriybelerge tiykarlanǵan halda baslanǵısh medicinalıq-sanitariya járdemin kórsetiwdiń jańa modelin engiziw bolıp esaplanadı.
Jańa sistemanı engiziwde shańaraqlıq shıpakerlerdiń jumısın keńeytiw áhmietli orınǵa iye. Sonıń ishinde, medicinalıq járdem kórsetiwde shańaraqlıq shıpakerlerdiń úlesin 70 procentke jetkeriw maqset etilgen.
Sonıń menen birge, medicina xızmetkerleriniń júklemesin azaytıwǵa qaratılǵan ilajlar da belgilengen. Atap aytqanda, medicina tarawın sanlastırıw, qaǵazpazlıqtı qısqartıw arqalı shıpakerlerdiń artıqsha byurokratiyalıq jumıslardan jıraq bolıwı támiynlenedi. Onda jumıs júklemesin derlik 30 procentke shekem azaytıw názerde tutılmaqta.
Pármanǵa muwapıq, 2025-jıl 1-iyulden baslap belgilengen rayon hám qalalarda jańa model tájiriybe-sınaq túrinde engiziledi. 2026-jıl 1-yanvardan bolsa bul tájiriybe Samarqand wálayatınıń barlıq rayon hám qalalarında keńeytiledi. Bul arqalı jańa modeldiń nátiyjeliligi ámelde sınaqtan ótkeriledi hám keleshekte pútkil mámleket boylap engiziliwine tiykar jaratıladı.
Tájiriybe – sınaq joybarı sheńberinde rayonlıq hám qalalıq medicina birlespeleri tiykarında jańa rayon (qala)lıq densawlıqtı saqlaw bólimleri shólkemlestiriledi. Bul strukturalar jergilikli dárejede medicinalıq xızmet kórsetiwdiń sapasın arttırıw, sistemalı basqarıwdı jolǵa qoyıw hám xalıqtıń talabına sáykes túrde xızmet kórsetiw imkaniyatın jaratadı.
