Balalardı qollap-quwatlaw Jámiyetlik fondı tárepinen Qaraqalpaqstan Respublikasında jasawshı járdemge mútáj, kem támiyinlengen, awır sharayatqa túsken shańaraqlardaǵı nawqas balalarǵa konsultativ hám qánigelestirilgen medicinalıq járdem kórsetiw maqsetinde gezektegi “Jaqsılıq mánzili” sociallıq-medicinalıq akciyası ótkerildi. Oǵan Tashkenttegi jetekshi klinika hám oraylardıń tájiriybeli qánigeleri qamtılǵan.
Nókis qalasındaǵı Respublikalıq balalar kóp tarmaqlı medicina orayında shólkemlestirilgen bul akciyadan gózlengen tiykarǵı maqset Qordıń medicinalıq baǵdarlamalarına tiykarlanıp awır diagnozlı nawqas balalardı emlew, biypul dári-dármaq quralları menen támiyinlew, olardıń salamatlıǵın turaqlı tiklep barıw, sońında operaciya isleniwine zárúr bolǵan nawqas balalarda quramalı operaciya ámeliyatların ótkeriwden ibarat.
– Balalardı qollap-quwatlaw Jámietlik fondı tárepinen bunday akciyalar respublikamız boylap turaqlı túrde ótkerilip kelinbekte. Ótken jıllar dawamında ótkerilgen medicinalıq akciyalar dawamında derlik 7000 nan aslam balalar medicinalıq tekseriwden ótkerildi, olarǵa sol jerdiń ózinde operaciya islenip, reabilitaciyalaw ilajları shólkemlesken túrde respublikalıq hám jergilikli shıpakerlerdiń qatnasıwında ámelge asırıldı,-deydi Tashkent pediatriya medicina institutı klinikasınıń bas shıpakeri Abdumalik Jalilov.
Qaraqalpaqstanda bir hápte dawamında ótkerilgen akciya dawamında 740 qa shamalas nawqas balalar hám olardıń ata-anaları kelip kórdi. Birinshi basqıshta barlıq balalar tereńlestirilgen medicinalıq tekseriwden ótkerildi. Shıpakerlerdiń usınıs hám juwmaqları tiykarında ayırım balalarǵa sol jerdiń ózinde, 120 balada, sonıń ishinde, 8 balada plastikalıq, 20 balada oftalmologiyalıq, 21 balada urologiyalıq, 64 balada LOR hám basqa da kesellikler boyınsha operaciya ámeliyatları hám sheberlik sabaqları ótkerildi.
– Mámleketimiz basshısınıń tikkeley baslaması menen Jámiyetlik fond shólkemlestirilgenine 3 jıl toldı. Ótken dáwir dawamında respublikamızdıń kóplegen aymaqlarınan medicinalıq-sociallıq járdemge mútáj balalarǵa qayırqomlıq járdemleri, operaciya qárejetleri tolıq qaplap berildi. Bul jerde ótkerilgen bul akciya sheńberinde de Jámiyetlik fond tárepinen tek ǵana balalardı operaciya etiw emes, al olardı salamatlandırıw, zárúr dári-dármaqlar menen támiyinlew sıyaqlı qárejetler de biypul ámelge asırıldı,-deydi Tashkent pediatriya medicina institutı klinikası bólim baslıǵı Visola Hamroeva. – Fond ótken 3 jıl dawamında 10 mıńnan aslam nawqas balalarǵa medicinalıq-sociallıq, psixologiyalıq hám mánzilli járdem kórsetip keldi. 1700 den aslam bala respublikamız aymaǵında, 220 sırt eldiń abıraylı klinikalarında quramalı operaciya ámeliyatın ótkerdi. 500 den aslam sheberlik sabaqları shólkemlestirildi. 360 balaǵa bilim alıwı hám kásip óner úyreniwi ushın materiallıq járdem berildi, oqıw quralları hám ádebiyatlar menen támiyinlendi. Fond birinshi márte orfan keselliklerine shalınǵan nawqas balalardı emlew boyınsha iri joybarǵa baslama kórsetti. “Jetilmegen osteogenez” keselligine shalınǵan balalardı medicinalıq emlew ushın zárúr texnologiyalıq ásbap-úskenelerdi biypul alıp berdi. Usı kúnge shekem, usı kesellik penen awırıp kelgen 110 balaǵa ámeliy járdem kórsetildi.
Álbette, bunday sociallıq akciyalardıń turaqlı ótkerilip atırǵanı nawqas balalardı tolıq emlew, olardı teńlesleri sıyaqlı salamat turmısqa qaytarıw jolındaǵı iygilikli ámellerden biri bolıp esaplanadı.
