Densawlıqtı saqlaw ministri Asılbek Xudayarov basshılıǵındaǵı delegaciya Tájikstannıń Dushanbe qalasında ótkerilgen ǴMDAǵa aǵza mámleketlerdiń densawlıqtı saqlaw tarawındaǵı birge islesiw Keńesiniń 38-májilisinde qatnasqanı haqqında xabar bergen edik.
Onda A.Xudayarov elimizde birlemshi medicinalıq-sanitariyalıq járdem sistemasın jetilistiriw boyınsha ámelge asırılıp atırǵan reformalar, keleshektegi áhmiyetli wazıypalar haqqında shıǵıp sóyledi. Sonday-aq, ilaj sheńberinde eki tárepleme ushırasıwlar ótkerildi.
Onda Qazaqstan Densawlıqtı saqlaw ministri Akmaral Alnazarova menen usı jılı 13-17-oktyabr kúnleri elimizdiń tórt aymaǵında Qazaqstan medicina kúnleri hám “Ózbekstan – Qazaqstan” medicina forumın shólkemlestiriw máselesi dodalandı. Sonday-aq, keleshekte kadrlar tayarlaw hám tájiriybe almasıw kólemin keńeytiwge kelisip alınǵan edi.
Ilaj sheńberinde Samarqand, Buxara, Ferǵana wálayatları qatarında Qaraqalpaqstan Respublikasına 13-oktyabr sánesinde Qazaqstan Respublikasınan bir qatar tájiriybeli medicina xızmetkerleri jetip keldi.
Dáslep, Qaraqalpaqstan medicina institutı klinikasında bolıp ótken ushırasıwda Qaraqalpaqstan medicina institutı rektorı, Sonday-aq Respublikalıq qánigelestirilgen kardiologiya ilimiy-ámeliy medicina orayı Qaraqalpaqstan Respublikası aymaqlıq filialı, Respublikalıq qánigelestirilgen ana hám bala salamatlıǵı ilimiy-ámeliy medicina orayı Qaraqalpaqstan Respublikası filialı, Respublikalıq qánigelestirilgen dermatovenerologiya hám kosmetologiya ilimiy-ámeliy medicina orayı Qaraqalpaqstan Respublikası aymaqlıq filialı, Respublikalıq qánigelestirilgen endokrinologiya ilimiy-ámeliy medicina orayı Qaraqalpaqstan filialı direktorları Qazaqstan Respublikasınan kelgen bir qatar wákiller menen óz-ara birge islesiw memorandumǵa qol qoyıldı hám aldaǵı ámelge asırılatuǵın ilajlar rejesi dodalandı.
