Búgingi kúni keleshek iyeleri bolǵan jaslar ushın keń imkaniyatlar jaratılmaqta. Mámleketimiz tárepinen shártnama pulların tólew ushın jeńilletilgen kreditler, subsidiyalar hám basqa da qolaylıqlar jaratıp berilmekte.
«Qońırat soda zavodı» juwapkershiligi sheklengen jámiyeti qospa kárxanası basshıları tárepinen bul jerde jumıs islep atırǵan jaslardıń bilim alıwına ayrıqsha itibar qaratılmaqta. Atap aytqanda, joqarı maǵlıwmatlı qánige bolıp shıǵıw tilegindegi jaslar hár tárepleme qollap-quwatlanbaqta.
Bıyılǵı jıldıń ózinde joqarı oqıw ornına hújjet tapsıratuǵın jaslar ushın matematika, ximiya, rus tili pánlerinen biypul tayarlıq kursları shólkemlestirilip, olarda 30 jas hár bir pán boyınsha bilimin jetilistirdi.
Jaqında 30 jas qánige hám bul jerde miynet etip atırǵan 4 xızmetkerdiń perzenti Tashkent qalasındaǵı D.I.Mendeleev atındaǵı Rossiya ximiya-texnologiya universitetine hújjet tapsırıp, test sınaqlarına barıp qayttı. Jaslardıń jol, miymanxana qárejetleri kárxana hám kásiplik awqamı tárepinen tólep berildi. Bunday imkaniyattan paydalanǵan jaslar test sınaqlarına qatnasıp, óz bilimlerin sınaqtan ótkerdi.
Test sınaqlarınan shártnama tiykarında oqıwǵa kirgen jaslar ushın jáne bir qolaylıq jaratıldı. Yaǵnıy shártnama tiykarında oqıytuǵın jaslardıń oqıw dáwirindegi barlıq shártnama pulı kárxana hám kásiplik awqamı tárepinen tólep berilip, pitkergennen keyin óz qánigeligi boyınsha jumıs islewge sharayat jaratıldı.
Házirgi waqıtta D.I.Mendeleev atındaǵı Rossiya ximiya-texnologiya universitetinde bilim alıp atırǵan eki studenttiń, sonday-aq, basqa joqarı oqıw orınlarında bilim alıp atırǵan 24 jastıń shártnama pulları tólep berildi. Jaslardıń bilim alıwına qaratılıp atırǵan bunday ayrıqsha itibar kárxananı jas qánigeler menen tolıqtırılıwına, óndiris kóleminiń artıwına, jańa ónimler islep shıǵarıw ideyalarınıń júzege shıǵıwına xızmet etpekte.
Parwaz BAShEROVA,
«Qońırat soda zavodı» JShJ qospa kárxanasınıń xızmetkeri.
Qaraqalpaqstan xabar agentligi
