U.Xalmuratov atındaǵı Respublikalıq kóp tarmaqlı medicina orayınıń májilisler zalında Qaraqalpaqstan Respublikası Densawlıqtı saqlaw ministri M.I.Kurbanovtıń basshılıǵında analar hám balalar salamatlıǵın qorǵaw, xalıqtıń reproduktivlik salamatlıǵın bekkemlew hám bul baǵdarda belgilengen wazıypalardıń orınlanıwın támiyinlew máselelerine baǵıshlanǵan májilis bolıp ótti.
Májiliste Respublikalıq qánigelestirilgen ana hám bala salamatlıǵı ilimiy-ámeliy medicina orayı Qaraqalpaqstan Respublikası filialı, Respublikalıq balalar kóp tarmaqlı medicina orayı, Nókis qalası hám rayonlıq medicina birlespeleriniń basshıları hám juwapker qánigeleri qatnastı.
Ilaj dawamında analıq hám balalıqtı qorǵaw baǵdarında 2026-jıldıń birinshi yarım jıllıǵında ámelge asırılǵan jumıslar, erisilgen nátiyjeler hám tarawdaǵı bar mashqalalar hár tárepleme dodalandı.
Sonday-aq, medicina mákemelerinde ishki infekciyalardıń aldın alıw hám olarǵa qarsı gúresiw, sanitariyalıq-epidemiologiyalıq talaplardıń orınlanıwın támiyinlew boyınsha ámelge asırılıp atırǵan jumıslar boyınsha Sanitariyalıq-epidemiologiyalıq tınıshlıq hám jámiyetlik salamatlıq xızmeti tárepinen ótkerilgen dodalaw juwmaqları kórip shıǵıldı.
Májiliste analar hám balalarǵa kórsetilip atırǵan medicinalıq xızmettiń sapasın bunnan bılay da arttırıw, hámiledar hayallar hám nárestelerdiń salamatlıǵın qorǵaw, balalar óliminiń aldın alıw, reproduktivlik salamatlıqtı bekkemlew hám medicinalıq mákemelerde infekciyalıq qáwipsizlikti támiyinlew boyınsha tiykarǵı wazıypalar belgilep alındı.
Dodalawlar juwmaǵında tiyisli basshı hám qánigelerge anıqlanǵan kemshiliklerdi saplastırıw, belgilengen wazıypalardıń orınlanıwın támiyinlew jáne analıq hám balalıqtı qorǵaw baǵdarındaǵı jumıslardı bunnan bılay da kúsheytiw boyınsha anıq tapsırmalar berildi.
Májilis juwmaǵında juwapker basshılarǵa belgilengen wazıypalardı óz waqtında hám sapalı ámelge asırıw, orınlaw tártibin bekkemlew jáne xalıqqa kórsetilip atırǵan medicinalıq xızmetlerdiń sapasın arttırıw boyınsha tiyisli ilajlardı kóriw wazıypaları júklendi.
