Nókis rayonı “Diyqan arna” mákan puqaralar jıyını aymaǵında Diyqan arna shańaraq shıpakerlik punktiniń ashılıw máresimi bolıp ótti.

Ilajǵa rayon hákimi Z.Zaytov, Qaraqalpaqstan Respublikası Densawlıqtı saqlaw ministri M.Qurbanov, rayon prokurorı P.Xalmuratov, Birlesken Milletler Shólkemi Rawajlanıw baǵdarlamasınıń awıllıq jerlerdi turaqlı rawajlandırıw boyınsha qánigesi G.Japaqova, medicina xızmetkerleri hám keń jámiyetshilik wákilleri qatnastı.

Ashılıw saltanatında Qaraqalpaqstan Respublikası Densawlıqtı saqlaw ministri M.Qurbanov hám basqalar shıǵıp sóylep, jańa imarattıń paydalanıwǵa tapsırılıwı menen jıynalǵanlardı qutlıqladı.

Sońǵı jılları elimizde barlıq tarawlar qatarında medicina tarawına da ayrıqsha itibar qaratılıp, bul baǵdarda húrmetli Prezidentimizdiń tikkeley basshılıǵında kólemli jumıslar ámelge asırılmaqta. Usı tiykarda xalqımızdıń densawlıǵın jaqsılaw, olarǵa sapalı medicinalıq xızmet kórsetiw, medicinalıq mákemelerdiń materiallıq-texnikalıq bazasın bekkemlew hám baslanǵısh medicinalıq xızmet kórsetiw mákemeleriniń jumısın túp-tiykarınan jetilistirilip jańa basqıshqa kóterilmekte.

Shıpakerlik punkti kúnine 50 nawqastı qabıllaw imkaniyatına iye bolıp, imaratta laboratoriya, shanshıw hám emlew xanası, aftoklav xanaları puqaralar ushın xızmet etedi. Ilaj dawamında miymanlar imarattıń ishki imkaniyatları menen tanısıp, qolaylıqların joqarı bahaladı.

Bul imarat OPEK xalıqaralıq rawajlanıw fondı qatnasıwında “Awıllıq jerlerdi turaqlı rawajlandırıw” joybarın ámelge asırıw ilajları haqqında”ǵı qarar tiykarında 3 mlrd.40 mln sumlıq qarjı ajıratılıp, qurıp pitkerildi.