Baspa sóz konferenciyası: Qaraqalpaqstan Respublikası balalar kóp tarmaqlı medicina orayı tárepinen ámelge asırılǵan hám aldaǵı ámelge asırılatuǵın jumısları haqqında baspa sóz konferenciyası ótkerildi.
Onda Respublikamızdıń ǴXQ wákilleri, medicina xızmetkerleri qatnastı.
Konferenciyada Respublika balalar kóp tarmaqlı medicina orayı bas shıpakeri Matkarimova Alima Abuovna, oray tárepinen ámelge asırılǵan hám aldaǵı rejeleri haqqında maǵlıwmat berdi.
Maǵlıwmat ornında atap ótiw kerek, Respublika balalar kóp tarmaqlı medicina orayı tárepinen densawlıqtı saqlaw sistemasın reformalaw, emlew profilaktikalıq mákemelerdiń materiallıq texnikalıq bazasın bekkemlew hám densawlıqtı rawajlandırıwdıń mámleketlik baǵdarlamasın orınlaw dawam ettirilip atır.
Búgingi kúnde Respublika balalar kóp tarmaqlı medicina orayında bólimler sanı 7 ni, orınlar sanı 235 ti quraydı.
Oraydın jumıslarınıń kólemi keńeyttirilip, jańadan laboratoriyalıq tekseriw usılları, ámeliyatqa joqarı texnologiyalıq emlew hám diagnostikalıq usıllar endirildi.
Orayda náresteler xirurgiyası profili boyınsha tuwma nuqsanlar menen jańa tuwılǵan nárestelerge operaciyalar islew jolǵa qoyılıp, balalarǵa joqarı texnologiyalıq operaciyalar islenip, olardıń ómirin saqlap qalıwda úlken áhmiyetke iye bolmaqta.
Oraydıń laboratoriya bólimi jańadan IXLA hám avtomat bioximiyalıq úskeneleri, operaciyalıq mikroskop, LOR tarawında endoskop apparatı menen támiyinlenip, júz jaq xirurgiyası rawajlanıp, urologiyalıq, rekonstruktiv plastik xirurgiyalıq operaciyalar jolǵa qoyılǵan, reanimaciya bólimleri jańa tuwılǵan nárestelerge reanimaciyalıq hám anesteziologiyalıq xızmet kórsetiw jaqsı jolǵa qoyıldı. Respublika qánigelestirilgen pediatriya ilimiy-ameliy medicina orayı, Respublika balalar milliy medicina orayı jetekshi qánigeleri menen birgelikte operaciyalar islew jolǵa qoyıldı.
Oray shıpakerleri hám miyirbiykeleri qánigeligin Tashkent qalasında hám shet ellerdiń rawajlanǵan medicina klinikalarında bilimlerin asırıp kelmekte.
Oraydın rawajlanıwı onıń materiallıq texnikalıq bazasınıń bekkemleniwi hám barlıq bólimlerdiń zamanagóy medicinalıq ásbap-úskeneler menen támiyinleniwi, joqarı mamanlıqtaǵı ilimiy kadrlardı – pediatr, balalar xirurgları, klinik ordinatorlar hám shıpakerlerin tayarlaw menen birgelikte ámelge asırılmaqta.
Oray qánigeleri xalıqaralıq ilimiy konferenciyalarda bayanatlar menen belsendi qatnasıp kelmekte. Keyingi on jıllıqlarda oray qánigeleri Rossiya, Germaniya, Belorussiya, Turkiya, Kuveyt, Hindstan, Koreya, Qıtay hám basqada mámleketlerdiń jetekshi qánigeleri menen tıǵız baylanısta jumıs alıp barmaqta.
Telemedicinanıń rawajlanıwıda medicinanıń jańadan qolǵa kirgizgen jetiskenlikleriniń biri bolıp esaplanadı.
Konferenciya dawamında qatnasıwshılar ózleri qızıqtırǵan sorawlarına juwaplar aldı.
QR Densawlıqtı saqlaw ministrligi Málimleme xızmeti
