Qaraqalpaqstan Respublikası Densawlıqtı saqlaw ministrligi tárepinen ǵalaba xabar qurallarınıń wákilleri ushın Respublikalıq qánigelestirilgen ana hám bala salamatlıǵı ilimiy-ámeliy medicina orayı mámleketlik mákemesiniń Qaraqalpaqstan Respublikası filialında press-tur shólkemlestirildi.
Press-turda filial direktorınıń orınbasarı Umid Xalliyev ǵalaba xabar qurallarınıń wákillerin orayda jaratılǵan imkaniyatlar menen jaqınnan tanıstırdı.
Atap ótilgenindey, filial tárepinen densawlıqtı saqlaw sistemasın reformalaw, emlew-profilaktika mákemeleriniń materiallıq-texnikalıq bazasın bekkemlew hám densawlıqtı saqlawdı rawajlandırıw mámleketlik baǵdarlamasın orınlaw dawam ettirilmekte.
Filial 230 orınnan ibarat bolıp, sonnan tólemli orınnan ginekologiya bóliminde 20, tuwıw bólimlerinde 16, patologiya bóliminde 14 orın ajıratılǵan.
– Filialda 4 tuwıw, 4 náresteler, skrining, reproduktivlik salamatlıq, másláhát poliklinikası, operativ ginekologiya, konservativ ginekologiya, laboratoriya, reanimaciya, náresteler patologiyası, náresteler reanimaciyası, operaciya, kir juwıw, avtoklav, asxana bólimleri xalıqqa xızmet kórsetip kelmekte, – deydi filial direktorınıń akusherlik hám ginekologiya isleri boyınsha orınbasarı U.Xalliev.
Usı kúnge shekem, yaǵnıy 2025-jıldıń 7 ayı dawamında 186 ginekologiyalıq operaciyalar orınlandı. Házirgi kúnde xalıqqa sapalı xızmet kórsetiw ushın Laboratoriya bólimi PZR apparatları menen támiyinlendi. Keńes poliklinikasınıń bólimine kolposkopiya apparatları alıp kelindi. Shıpakerler tárepinen joqarı texnologiyalıq apparaturalar, yaǵnıy, laproskop hám gisteroskop apparatları járdeminde operaciyalar orınlanbaqta.
Press-tur dawamında qatnasıwshılar filialda shıpakerlerdiń jumısı hám puqaralar ushın jaratılǵan sharayatlar menen tanısıp, ózlerin qızıqtırǵan sorawlarına juwap aldı.
