Qaraqalpaqstan Respublikası Densawlıqtı saqlaw ministrligi tárepinen medicina tarawında xalıqaralıq birge islesiwlerdi jolǵa qoyıw hám sırt el tájiriybesin elimizge alıp kiriw boyınsha bir qatar unamlı ilajlar ámelge asırılmaqta.

Usınday ámeliy ilajlardı ele de dawam ettiriw maqsetinde Qaraqalpaqstan Respublikası Densawlıqtı saqlaw ministrligi tárepinen Qaraqalpaqstan Respublikasında medicina sistemasında 2025-jıl ushın eń áhmiyetli nátiyjelilik kórsetkishlerine erisiw boyınsha tastıyıqlanǵan ilajlar baǵdarlaması sheńberinde Qaraqalpaqstan Respublikası Densawlıqtı saqlaw ministrligine qaraslı medicinalıq mákemelerdiń sırt elde qánigeligin arttırıw belgilengen.

Házirgi waqıtta, Qaraqalpaqstan Rspublikası AIJSqa qarsı gúresiw orayı bas shıpaker orınbasarı A.Nazarbaeva, oraydıń shólkemlestiriwshilik-metodikalıq bólim baslıǵı R.Kudryakovlar Belarus Respublikası Minsk qalasinda xizmet saparinda bolıp atır.

– Bul jerde bizler hár kúni emlew-profilaktika mákemelerinde jaratılǵan imkaniyatlar menen tanısıp, tájiriybeli shıpakerler hám basqa da qánigeler menen pikir alısıp atırmız,-deydi Qaraqalpaqstan Rspublikası AIJSqa qarsı gúresiw orayı bas shıpaker orınbasarı A.Nazarbaeva. – Solay eken, bunday xızmet saparları bir tárepten sırt elli kásipleslerimiz benen tájiriybe almasıw bolsa, ekinshi tárepten medicina turizminiń rawajlanıwına sebep boladı. Álbette, rawajlanǵan medicina bar jerde, nawqaslar ushın da hár tárepleme imkaniyatlar jaratıladı. Mámleketimizde medicina qansha rawajlansa, puqaralar ushın qolaylıqlar boladı.