Qaraqalpaqstan Respublikası Densawlıqtı saqlaw ministrligi tárepinen ǵalaba xabar qurallarınıń wákilleri ushın Qaraqalpaqstan Respublikası balalar ftiziatriya sanatoriyasında press-tur shólkemlestirildi.
Qaraqalpaqstan Respublikası balalar ftiziatriya sanatoriyası 4 jastan 18 jasqa shekemgi tuberkulezdiń aktiv hám sóniwshi formaları menen kesellengen balalarǵa mólsherlengen. Balalardıń emlew múddeti keselliktiń diagnozı hám fazalarına baylanıslı boladı.
Ózbekstan Respublikası Prezidentiniń 2022-jıl 7-iyuldegi “Qaraqalpaqstan Respublikasında 2022-2024-jıllarda xalıqtıń salamatlıǵın qorǵawdı bunnan bılay da kúsheytiw haqqında”ǵı PQ-310-sanlı qararına muwapıq Xojeli rayonında 80 orınlıq Balalar ftiziatriya sanatoriyası shólkemlestirildi.
Shıpakerler tárepinen medicinalıq tekseriwler óz waqtında ótkerilip, zárúr dári-dármaqlar hám kerekli emlewler diagnoz tiykarında óz waqtında tolıq ámelge asırıladı. Qosımsha keselliklerdi emlewde vitaminler, zárúrlik bolǵanda antibiotikler hám fizioterapiya, LFK buyırıladı. Bunnan tısqarı rentgen, laboratoriya, stomatologiya kabinetleri bar.
Sanatoriyada balalardıń awqatlanıwı 5 mezgil. Bólim shıpakerleriniń kórsetpeleri boyınsha 11-sanlı stol qollanıladı. Menyu talapları Ózbekistan Respublikası Densawlıqtı saqlaw ministrliginiń 1993-jılǵı 122-sanlı buyırıǵı tiykarında dúziledi. Hár sherekte rayonlıq sanitariyalıq-epidemiologiyalıq qadaǵalaw orayı tárepinen awqatlardıń kaloriyalıq, ximiyalıq quramı tekserip barıladı.
Sanatoriyǵa emleniw ushın balalar Respublikalıq ftiziatriya hám pulmonologiya orayı, rayonlıq hám qalalıq tuberkulyozge qarsı dispanserleri, kabinetler shıpakerleriniń jollaması menen keledi.
Sanatoriyda 2024-jıl dawamında jámi 514 bala, 2025-jıldıń 8 ayında 443 bala salamatlastırıldı.
Balalar ushın hár bir qabatta hájetxana, juwınıw, sheshiniw hám dush qabıl etiw xanaları, qızlar ushın gigiena xanaları bar. Balalardıń oqıwdan bos waqıtlarında dem alıwı ushın hár bir qabatta televizorlar, muzlatqıshlar islep tur. “Mehriyban insanlar” qorı tárepinen balalardıń bos waqıtların mazmunlı ótkeriw ushın dem alıw hám oynaw ushın xana shólkemlestirilip berildi.
Sanatoriyda emlew menen bir qatarda balalarǵa ulıwma bilim beriw de jolǵa qoyılǵan.
Mektepte 1-klasstan 11-klassqa shekemgi barlıq pánler boyınsha kabinetler úskenelengen. Jámi 24 oqıtıwshı hám 4 tárbiyashı jumıs alıp baradı. Barlıq sabaqlar hám oqıw processleri Ózbekstan Respublikası Bilimlendiriw ministrligi tárepinen tastıyıqlanǵan baǵdarlama hám rejeler tiykarında alıp barıladı. Balalardıń oqıw hám sabaqtan bos waqıtlarınan nátiyjeli paydalanıw maqsetinde hár qıylı pán dógerekleri menen birgelikte kórkem-háweskerlik dógeregi jumıs alıp baradı.
Balalar sanatoriyada ótkeriletuǵın barlıq bayram koncert baǵdarlamalarında belsendi qatnasadı. Dem alıs waqıtları qala boylap ekskursiya hám teatrlarga alıp barıladı.
Press-tur dawamında qatnasıwshılar filialda shıpakerlerdiń jumısı hám puqaralar ushın jaratılǵan sharayatlar menen tanısıp, ózlerin qızıqtırǵan sorawlarına juwap aldı.
