Qaraqalpaqstan Respublikası Densawlıqtı saqlaw ministrligi tárepinen ǵalaba xabar qurallarınıń wákilleri ushın Respublikalıq qánigelestirilgen kardiologiya ilimiy-ámeliy medicina orayınıń Qaraqalpaqstan Respublikası aymaqlıq filialında baspasóz konferenciyası ótkerildi.
Konferenciyada usı filialdıń direktorı Mels Qutlımuratov tárepinen filialda ámelge asırılǵan jumıslar hám aldaǵı rejeleri haqqında keń túrde maǵlıwmat berildi.
Atap ótilgenindey, filial tárepinen densawlıqtı saqlaw sistemasın reformalaw, emlew-profilaktika mákemeleriniń materiallıq-texnikalıq bazasın bekkemlew hám densawlıqtı saqlawdı rawajlandırıw mámleketlik baǵdarlamasın orınlaw dawam ettirilmekte.
Ózbekstan Respublikası Prezidenti Sh.M.Mirziyoevtiń basshılıǵında 2020-jıl 6-noyabrde keńeytilgen tárizde ótkerilgen videoselektor májilisiniń 88-sanlı bayanlamasınıń 27-bántinde berilgen tapsırmalar, Ózbekstan Respublikası Densawlıqtı saqlaw ministrliginiń 2020-jıl 15-dekabrdegi 338-sanlı “Aymaqlıq densawlıqtı saqlaw mákemelerinde qánigelestirilgen medicinalıq járdem kórsetiwdi bunnan bılay da rawajlandırıw boyınsha qosımsha ilajlar haqqında”ǵı buyrıǵınıń 6-bántine tiykarlanıp “Aralboyı xalqınıń júrek-qan tamır keselliklerin salamatlandırıw orayı” Respublikalıq qánigelestirilgen kardiologiya ilimiy-ámeliy medicina orayı Qaraqalpaqstan Respublikası aymaqlıq filialı etip qayta shólkemlestirildi.
Respublikalıq qánigelestirilgen kardiologiya ilimiy-ámeliy medicina orayı Qaraqalpaqstan Respublikası aymaqlıq filialı 1985-jılı ashılǵan bolıp, tiykarǵı maqseti hám wazıypası Qaraqalpaqstan Respublikası xalqına qánigelestirilgen kardiologiyalıq járdem kórsetiw, joqarı texnologiyalıq tekseriw hám emlew xızmetin kórsetiw bolıp esaplanadı.
Filialda jámi 135 orınlıq bolıp, sonnan 40 orınlıq “Júrek aritmiyası hám ishemik kesellikler” bólimi, 25 orınlıq “Arterial gipertoniya” bólimi, 30 orınlıq “Miokard infarkti hám qıstawlı kardiologiya” bólimi, xojalıq esabındaǵı 40 orınlıq Reabilitaciya hám Rentgen-endovaskulyar xirurgiya bólimleri bar. Bul bólimlerde hár jılı ortasha 4800-5200 nawqas emlenip, óz salamatlıǵın tiklep shıǵadı. Onda 1 shıpaker medicina ilimleriniń kandidatı, 2 “Qaraqalpaqstanǵa xızmet kórsetken shıpaker,” joqarı hám birinshi dárejeli kategoriyalarǵa iye jámi 34 shıpaker xızmet kórsetpekte.
Sonday-aq, filialda 150 qatnawǵa mólsherlengen aymaqlıq másláhát poliklinikası, laboratoriya, diagnostika bólimi, fizioterapiya, qabıllawxana, asxana jumıs islemekte. Diagnostika bóliminde kompyuterli Rentgen apparatı, UZI, EKG, VEM, Xolter-monitor, SMAD, Kompyuter tomografiya apparatları islep tur.
Filialda 2020-jıldan baslap xalıqqa joqarı texnologiyalıq diagnostika hám emlew jumısları alıp barılmaqta. 2023-jılı jámi 544 joqarı texnologiyalıq operaciyalar ámelge asırılǵan bolsa, sonnan 234 operaciya stend qoyıldı, 2024-jılı 457 operaciya ámelge asırılıp, sonnan 194 nawqasqa stend qoyıldı. 2025-jıldıń ótken 9 ayında 281 xirurgiyalıq ámeliyatı ótkerilip, sonnan 135 nawqasqa stend qoyıw jolı menen joqarı texnologiyalıq operaciyalar ámelge asırıldı.
Ǵalaba xabar qurallarınıń wákilleri baspasóz konferenciyasınan soń filialda jaratılǵan imkaniyatları menen tanısıp, ózleri qızıqtırǵan sorawlarına juwaplar aldı.
