Keselliklerdiń aldın alıw hám salamat turmıs tárizin úgit-násiyatlawǵa qaratılǵan bul akciya Nókis qalasında 2-oktyabr kúni baslanıp 31-oktyabrge shekem dawam etedi.

Marafon sheńberinde aymaqtaǵı shańaraqlıq poliklinikalarda Respublikalıq qánigelestirilgen medicina oraylarınıń jetekshi shıpakerleri, bir topar sırt elli qánigeler hám jergilikli medicina xızmetkerleri tárepinen xalıqtıń barlıq qatlamı biypul medicinalıq tekseriwden ótkeriledi.

Usı tiykarda keselliklerdi erte basqıshta anıqlaw hám nátiyjeli emlew boyınsha zárúr usınıslar beriledi. Óz gezeginde tekseriw nátiyjeleri zamanagóy málimleme sistemaları arqalı birden-bir elektron bazaǵa kirgizilip, keleshekte nawqaslardıń salamatlıǵı turaqlı monitoring etip barıladı.

Sonday-aq, Nókis qalasınıń xalıq kóp jıynalatuǵın orınlarında “Salamatlıq maydanshaları” shólkemlestirilip, bul mánzillerde salamat turmıs tárizi hám durıs awqatlanıwdı úgit-násiyatlawǵa baylanıslı hár qıylı akciyalar shólkemlestiriledi.

Óz densawlıǵıńızǵa itibarsız bolmań!
Salamat turmıs tárepke isenimli qádem taslań! Marafonda qatnasıń!

QR Densawlıqtı saqlaw ministrligi
Málimleme xızmeti