Keyingi jıllarda Ózbekstan hám Qazaqstan arasında densawlıqtı saqlaw tarawındaǵı óz-ara nátiyjeli birge islesiw jańa basqıshqa kóterilmekte. Atap aytqanda, 2025-2026-jıllarǵa baǵdarlanǵan eki mámleket Densawlıqtı saqlaw ministrlikleri arasındaǵı birge islesiwdi rawajlandırıw boyınsha tiykarǵı ilajlar rejesi islep shıǵılıp, onıń sheńberinde keń kólemli jumıslar alıp barılmaqta.
Máselen, respublikalıq qánigelestirilgen ilimiy-ámeliy medicina orayları tárepinen Qazaqstannıń abıraylı klinikaları menen tájiriybe almasıw jolǵa qoyılǵan. Bir qatar medicinalıq joqarı oqıw orınları arasında oqıtıwshı hám studentler almasıwı, birgelikte ilimiy-izertlewler ótkeriw hám taraw qánigeleriniń mamanlıǵın arttırıw, sheberlik sabaqları hám kórgizbeli xirurgiyalıq ámeliyatlar barǵan sayın úzliksiz dawam etpekte.
Elimizge kelgen bir qatar qazaqstanlı hám Akademik Yо.X.Turakulov atındaǵı Respublikalıq qánigelestirilgen endokrinologiya ilimiy-ámeliy medicina orayınıń joqarı tájiriybeli qánigeleri tárepinen Qaraqalpaqstan medicina institutında seminar ótkerildi.
Seminarǵa instituttıń professor oqıtıwshıları, student jasları qatnasıp, ózlerin qızıqtırǵan sorawlarına juwaplar aldı.
