“Yuksalish” háreketi tárepinen Respublikalıq qan quyıw stanciyası menen birgelikte 28-oktyabrden 3-noyabrge shekem elimiz boylap “Biz – donormız!” qayırqomlıq akciyası ótkerilmekte.

Bul – basqalarǵa jaqsılıq etiw, qıyın jaǵdaydaǵı insanlarǵa járdem beriw nietinde bolǵanlar ushın imkaniyat.

“Yuksalish” háreketiniń baslaması menen ótkerilip atırǵan “Biz – donormız!” atamasındaǵı donorlıq qayırqomlıq akciyası 29-oktyabr kúni Qaraqalpaqstan Respublikası qan quyıw stanciyasında da ótkerildi.

Onda, joqarı oqıw orınlarınıń oqıtıwshıları hám studentleri, Milliy gvardiya xızmetkerleri, jaslar hám belsendi puqaralar qatnastı.

Baslamanıń maqseti – donorlıq qan rezervin tolıqtırıw hám jámiyette donorlıq mádeniyatın rawajlandırıw bolıp esaplanadı. Sonday-aq, akciya jámiyette óz-ara járdem mádeniyatın qáliplestiriw, bul processtiń áhmiyetin keńnen túsindiriw, sonday-aq, donor qanınıń jetispewshiligi mashqalasına jámiyetshiliktiń itibarın tartıw bolıp esaplanadı.

Donordıń qanı hár kúni qıyın jaǵdaylarǵa túsken insanlardıń ómirin saqlap qaladı. Awır operaciyalardı basınan ótkergen nawqaslar, avtoavariyalarda jábirlengenler, onkologiyalıq kesellikler menen awırǵanlar hám qan quyıwdı talap etetuǵın basqa da kóplegen diagnozları bar adamlar usılar qatarına kiredi. Akciya dawamında toplanǵan qan rezervleri medicina mákemeleriniń nawqaslarǵa járdem kórsetiw imkaniyatın arttıradı.

Bunday ilajlardı turaqlı ótkeriw emlewxanalar hám medicina oraylarında qannıń jeterli dárejede támiyinleniwine járdem beredi, bul ásirese, ayrıqsha jaǵdaylar hám rejelestirilgen operaciyalar ushın áhmiyetli.