Hár jılı noyabr ayınıń ekinshi ekshembisi shıpakerlerdiń kásiplik bayramı sıpatında keńnen belgilenip kelinbekte.
Qaraqalpaqstan Respublikası Densawlıqtı saqlaw ministrligi Ózbekstan densawlıqtı saqlaw xızmetkerleri kásiplik awqamınıń Qaraqalpaqstan Respublikası Keńesi menen birgelikte “Medicina xızmetkerleri kúni” múnásibeti menen Qaraqalpaqstan Respublikası aymaqlıq balalar reabilitaciya orayınıń májilisler zalında “Medicina xızmetkerleri kúni” bayramı múnásibeti menen bayram ilajı bolıp ótti.
Bayram ilajında Qaraqalpaqstan Respublikası Ministrler Keńesiniń Jaslar siyasatı, sociallıq rawajlandırıw hám ruwxıy-aǵartıwshılıq isleri boyınsha sekretariat baslıǵı B.Kalimbetov, Ózbekstan kásiplik awqamları Federaciyasınıń Qaraqalpaqstan keńesi baslıǵı U.Jalmenov, Qaraqalpaqstan Respublikası densawlıqtı saqlaw ministri M.Kurbanov, Ózbekstan densawlıqtı saqlaw xızmetkerleri kásiplik awqamınıń Qaraqalpaqstan Respublikası keńesi baslıǵı L.Baybasinova, Ózbekstan Shıpakerler Associaciyası Qaraqalpaqstan bólimi baslıǵı S.Begaliev, medicina xızmetkerleri hám taraw nuranıyları qatnastı.
Shıǵıp sóylegenler bársheni bayram menen qızǵın qutlıqladı.
Ilajda Ózbekstan densawlıqtı saqlaw xızmetkerleri kásiplik awqamınıń Qaraqalpaqstan Respublikası Keńesiniń xızmetkerlerine, densawlıqtı saqlaw tarawında jemisli miynet etken miynet nuranıylarına, densawlıqtı saqlaw tarawındaǵı jemisli xızmeti ushın pidayı xızmetkerlerge “Húrmet jarlıǵı” hám bahalı sawǵalar tapsırıldı.
Sonday-aq, Qaraqalpaqstan Respublikası Ministrler Keńesiniń Húrmet jarlıqları, “Ózbekstan Respublikası densawlıqtı saqlaw aǵlası” kókirek belgisi, Ózbekstan Respublikası Densawlıqtı saqlaw ministrliginiń Alǵısnaması, Qaraqalpaqstan Respublikası densawlıqtı saqlaw ministriniń “Alǵısnaması” tapsırıldı.
