Respublikalıq tez medicinalıq járdem orayı Qaraqalpaqstan Respublikası filialında tez medicinalıq járdem xızmetkerlerin tayarlaw hám qayta tayarlaw oqıw-simulyaciya orayınıń saltanatlı ashılıw máresimi bolıp ótti. Ilajda Qaraqalpaqstan Respublikası Ministrler Keńesiniń Jaslar siyasatı, sociallıq rawajlanıw hám ruwxıy-aǵartıwshılıq isleri boyınsha sekretariatınıń baslıǵı Bekbay Kalimbetov, Qaraqalpaqstan Respublikası Densawlıqtı saqlaw ministrligi hámde Respublikalıq tez medicinalıq járdem orayı wákilleri, keń jámiyetshilik hám ǵalaba xabar quralları wákilleri qatnastı. Bul oqıw-simulyatsiya orayı Respublika tez medicinalıq járdem orayı hám Koreya xalıq aralıq Densawlıqtı saqlaw fondı (KOFIH) menen birgelikte ámelge asırılıp atırǵan “Ózbekstanda emlewxanaǵa shekemgi tez medicinalıq járdem xızmet intalılıǵın asırıw” boyınsha grant joybarı sheńberinde dúzildi. Usı grant joybarınıń tiykarǵı maqseti emlewxanaǵa shekemgi bolǵan basqıshta medicina xızmetkerleriniń intalılıǵın hám mamanlıǵın asırıw arqalı Ózbekstanda tez medicinalıq járdem sapasın jaqsılawdan ibarat. Joybardı ámelge asırıw 2019-jılda baslanǵan bolıp, 2023-jılda onıń birinshi fazası tamamlandı jáne onıń sheńberinde Tashkent hám Samarqand qalalarında oqıw-sımulyaciya orayları dúzildi. Koreya tárepinen 2,8 mln. AQSh dolları ajıratıldı. 2024-jılda ekinshi faza baslandı, onıń sheńberinde mámlekettiń barlıq aymaqlarında sonday oqıw-simulyaciya orayları shólkemlestiriledi. Ekinshi fazanı ámelge asırıw ushın 8 mln. AQSh dolları ajıratıldı. Búgin Nókis qalasında Koreyalı sheriklerimiz járdeminde Respublikalıq tez medicinalıq járdem orayı Qaraqalpaqstan Respublikası filialında oqıw simulyaсiya orayı ashıldı. Bul oqıw-sımulyaсiya orayı tez medicinalıq járdem xızmetkerlerin (shıpakerler, feldsherler hám aydawshılar) bazalıq hám keńeytilgen reanimaciya, jańa tuwılǵan balalar reanimaciyası, pediatriya ámeliyatında bazalıq reanimaciya, emlewxanaǵa shekemgi bolǵan jaraqatlar, keshiktirilmeytuǵın tuwıw hám basqalar boyınsha oqıtıw ushın zamanagóy simulyatorlar menen úskenelestirilgen. Sonıń menen birge, alıs aymaqlarda tez medicinalıq járdem xızmetkerlerin oqıtıw ushın mobil úskeneler bar. Búgingi kúnde Respublikalıq tez medicinalıq járdem orayı Qaraqalpaqstan Respublikası filialında 163 brigada, atap aytqanda, 10 reanimaciya, 114 ulıwma shıpakerlik, 35 feldsherlik hám 4 psixiatriya brigadaları iskerlik kórsetip atır. Filial xızmetkerlerdiń ulıwma sanı 3 560 dana bolıp, sonnan 945 shıpakerler, 1 450 orta medicina xızmetkerler, 760 aydawshılar bolıp tabıladı. Jańadan shólkemlestirilgen oqıw-simulyaciya orayında shınıǵıwlar ótkeriw ushın Qaraqalpaqstan filialı xızmetkerlerinen 4 instruktor Koreya Respublikasında tayarlandı. Atap ótiw kerek, házirgi waqıtta tez medicinalıq járdem kórsetiw salasında reformalar alıp barılmaqta, processler transformaciyalanıp atır. Xızmetkerlerdi tayarlaw hám qayta tayarlaw, jańa bilim hám kónlikpelerge úyretiw mámleketimiz xalqına tez medicinalıq járdem kórsetiw sapasın jaqsılawǵa xızmet etedi. 
Esletip ótemiz, aldınraq Respublikalıq tez medicinalıq járdem orayı Surxandárya wálayatı filialında da usınday oqıw-simulyatsiya orayı ashılǵan edi.
