Qaraqalpaqstan Respublikası Densawlıqtı saqlaw ministrliginiń baslaması menen Respublikalıq qánigelestirilgen dermatovenerologiya hám kosmetologiya ilimiy-ámeliy medicina orayınıń Qaraqalpaqstan Respublikası aymaqlıq filialında 2025-jılı ámelge asırılǵan hám keleshekte ámelge asırılatuǵın jumıslar haqqında baspasóz ánjumanı ótkerildi.
Onda Qaraqalpaqstan Respublikası ǴXQ wákilleri, medicina xızmetkerleri qatnastı.
Respublikalıq qánigelestirilgen dermatovenerologiya hám kosmetologiya ilimiy-ámeliy medicina orayı Qaraqalpaqstan Respublikası aymaqlıq filialı bas shıpakeri Marat Eshonov oray tárepinen 2025-jılı ámelge asırılǵan hám keleshektegi rejeleri haqqında maǵlıwmat berdi.
Maǵlıwmat ornında atap ótiw orınlı, Respublikalıq qánigelestirilgen dermatovenerologiya hám kosmetologiya ilimiy-ámeliy medicina orayı Qaraqalpaqstan Respublikası aymaqlıq filialı tárepinen densawlıqtı saqlaw sistemasın reformalaw, emlew-profilaktika mákemeleriniń materiallıq bazasın bekkemlew hám densawlıqtı saqlawdı rawajlandırıw mámleketlik baǵdarlamasın orınlaw dawam ettirilmekte.
Búgingi kúnde Respublikalıq qánigelestirilgen dermatovenerologiya hám kosmetologiya ilimiy-ámeliy medicina orayı Qaraqalpaqstan Respublikası aymaqlıq filialında bólimler sanı 7 ge, orınlar sanı 75 ke jetti.
Filialda jańa laboratoriyalıq tekseriw hám fizioterapiya kosmetologiya jumıslarınıń kólemi keńeytildi.
Filialdıń rawajlanıwı onıń materiallıq-texnikalıq bazası bekkemleniwi hám barlıq bólimlerdiń zamanagóy medicinalıq ásbap-úskeneler menen támiyinleniwi, joqarı mamanlıqtaǵı ilimiy kadrlar hám dermatovenerolog-shıpakerlerdi tayarlaw menen birgelikte ámelge asırılmaqta.
Filial qánigeleri xalıqaralıq ilimiy ánjumanlarda belsene qatnasıp kelmekte. Sońǵı 10 jılda filialdıń dermatovenerolog qánigeleri Túrkiya, Ázerbayjan, Qazaqstan hám basqa da mámleketlerdiń jetekshi qánigeleri menen tıǵız birge islesiwde jumıs alıp barmaqta.
Telemedicinanıń rawajlanıwında medicinanıń jańa qolǵa kirgizgen jetiskenliklerinen biri bolıp esaplanadı.
Konferenciya qatnasıwshıları filialdaǵı sharayatlar menen tanısıp shıqtı hám ózlerin qızıqtırǵan sorawlarına juwaplar aldı.
QR Densawlıqtı saqlaw ministrligi
Málimleme xızmeti.
