Ellikqala rayonında “Salamatlıq marafonı” ǵalabalıq ilajın 2-fevraldan 28-fevralǵa shekem ótkeriw belgilendi. Usı ilaj sheńberinde marafonnıń oraylıq ótkeriw ornı, “Salamatlıq marafonı” boyınsha medicinalıq tekseriwler shólkemlestiriletuǵın baslanǵısh medicinalıq-sanitariyalıq járdem mákemeleri hám “Salamatlıq maydanshaları”nıń mánzilleri anıqlap alındı. Ilajdıń ashılıw máresiminde Qaraqalpaqstan Respublikası Densawlıqtı saqlaw ministriniń birinshi orınbasarı A.Asqarov, Ellikqala rayonı hákiminiń orınbasarı A.Atadjanov, rayonlıq medicina birlespesiniń basshıları, medicina xızmetkerleri hám tiyisli shólkemlerdiń basshıları qatnastı. Shıǵıp sóylegenler “Salamatlıq marafonı”nıń xalıqtıń salamatlıǵın bekkemlew, keselliklerdi erte anıqlaw hám aldın alıw, sonday-aq, salamat turmıs tárizin keńnen úgit-násiyatlawdaǵı áhmiyetine hár tárepleme toqtap ótti. Sonıń ishinde, rayondaǵı 7 shańaraqlıq poliklinika hám 6 shańaraqlıq shıpakerlik punktlerinde xalıq kontingenti profilaktikalıq medicinalıq tekseriwlerden hám ǵalabalıq skrining tekseriwlerinen ótkeriletuǵını belgilendi. Sonday-aq, sozılmalı kesellikleri bar bolǵan nawqaslar Respublikanıń jetekshi qánigeleriniń kóriwine hám joqarı texnologiyalıq operaciyalar ushın tańlap alınadı. Kórsetpege tiykarlanıp 11 túrdegi laboratoriyalıq hám 7 túrdegi instrumentallıq tekseriwler, sonday-aq, tar taraw qánigelerine jiberiw jumısları sistemalı túrde ámelge asırıladı. Marafon hápteniń barlıq kúnleri, saat 09:00 den 17:00 ge shekem ámelge asırıladı. 📌 Áziz Ellikqalashılar! Siz de bul salamat turmısqa qaratılǵan iygilikli baslamadan shette qalmań! Óz densawlıǵıńızǵa itibarsız bolmań! Salamat turmıs tárepke isenimli qádem taslań! Marafonda qatnasıń!