Qaraqalpaqstan Respublikası Densawlıqtı saqlaw ministrligi tárepinen Nókis rayonlıq medicina birlespesinde ǵalaba xabar quralları wákilleri ushın media tur shólkemlestirildi.
Onda Respublikamızdıń ǴXQ wákilleri, medicina xızmetkerleri qatnastı.
Dáslep ǵalaba xabar quralları wákilleri ushın baspasóz konferenciyası ótkerilip, onda birlespe baslıǵı Aybek Tajimuratov birlespe tárepinen ámelge asırılǵan jumıslar hám aldaǵı rejeleri haqqında maǵlıwmat berdi.
Atap ótilgenindey, Nókis rayonı xalqına medicinalıq járdem kórsetiw ushın búgingi kúnde ambulator xızmet ushın 1 kóp tarmaqlı oraylıq poliklinika, 2 shańaraqlıq poliklinika, 4 shańaraqlıq shıpaker punktleri hám stacionar járdem kórsetiw ushın 142-orınǵa iye 1 oraylıq emlewxana xızmet kórsetip kelmekte.
Joqarıda kórsetilgen emlew-profilaktika mákemelerinde 105 shıpaker hám 399 orta buwın xızmetkerleri rayon xalqına medicinalıq xızmet kórsetpekte.
Emlewxana zamanagóy medicinalıq ásbap-úskeneler, yaǵnıy narkoz apparatı, rentgen apparatı, laboratoriyalıq bioximiyalıq analizator, mikroskoplar menen támiyinlendi. Barlıq medicinalıq apparatlar iske qosıldı.
Ózbekstan Respublikası Prezidentiniń usınısı menen Qaraqalpaqstan Respublikasınıń ekonomikalıq-sociallıq jaǵdayın rawajlandırıw ushın hár bir rayonǵa wálayatlar biriktirildi. Nókis rayonına Samarqand wálayatı biriktirilip medicina tarawına 1mlrd 100mln. sum qarjı berildi. Usı qarjıǵa ambulator medicinalıq xızmet tarawınıń jumısların jaqsılaw maqsetinde shańaraqlıq poliklinikalarǵa 3 dana sanitar avtomashinası alıp berildi. Rayonnıń sociallıq járdemge mútáj puqaralar ishinen quramalı qánigelestirilgen operaciyaǵa mútáj nawqaslardan 19 nawqasqa Samarqand wálayatı shıpakerleri tárepinen operaciyalar islendi.
Rayonlıq medicina birlespesine qaraslı kóp tarmaqlı oraylıq poliklinikada “Salamatlıq” xanası, “Fitnes” xanası hám “Salamat awqatlanıw” xanası shólkemlestirildi. Atap aytqanda, “Salamatlıq” bólmesine tiyisli kompyuter toplamları, kórgizbeli bannerler, “Fitnes” bólmesine tiyisli úskene (juwırıw jolı), “Salamat awqatlanıw” bólmesinde tiyisli kompyuter toplamları, bukletler hám kórgizbeli bannerler menen támiyinlendi.
Rayonlıq medicina birlespesin sanlastırıw boyınsha bir qansha jumıslar alıp barılmaqta. Sonıń ishinde, 2025-jıldıń 12 ayı dawamında 99 dana kompyuter, 55 dana planshet, 16 dana smart televizor, 4 dana printer, 9 dana chek printer, 12 dana modem rotor, 5 dana veb kamera, 29 dana termoprinter, 36 dana 2D skaner, 4 dana INFOKIOSKlar menen támiyinlendi.
Nókis rayonı medicina birlespesi tárepinen birlespege UZT hám Lazer apparatları alındı.
Media tur qatnasıwshıları birlespedegi jaratılǵan sharayatlar menen tanısıp, ózlerin qızıqtırǵan sorawlarǵa juwaplar aldı.
