Qaraqalpaqstan Respublikası Densawlıqtı saqlaw ministrliginiń Málimleme xızmeti tárepinen Respublikalıq balalar stomatologiya poliklinikasına ǵalaba xabar quurallarınıń wákilleri ushın baspa sóz konferenciyası shólkemlestirildi.
Onda mákemeniń búgingi jumısı, materiallıq-texnikalıq bazası hám balalarǵa kórsetilip atırǵan stomatologiyalıq járdem sapası haqqında hár tárepleme maǵlıwmatlar berildi.
Ilajda atap ótilgenindey, Respublikalıq balalar stomatologiya poliklinikası Nókis qalası hám respublikamızdıń barlıq aymaqlarınan kelgen 0 jastan 18 jasqa shekemgi balalarǵa biypul stomatologiyalıq járdem kórsetedi. Poliklinika kúnine 250 balanı qabıllaw imkaniyatına iye bolıp, jumıs waqtı azanǵı saat 8:00 den keshki saat 18:00 ge shekem belgilengen.
Mákeme eki qabatlı qolaylastırılǵan imaratta jaylasqan. Birinshi qabatta hákimshilik-xojalıq xanaları hám xojalıq esabındaǵı bólim jumıs alıp barsa, ekinshi qabatta emlew bólimi, operaciya xanası, PCS xanası hám fizioterapiya xanası jaylasqan.
Baspasóz ánjumanında bólim baslıǵı Gúlzabira Annaqulovanıń atap ótiwinshe, poliklinika tolıq modernizaciyalanǵan hám zamanagóy ásbap-úskeneler menen támiyinlengen. Xanalarda jámi 22 zamanagóy stomatologiyalıq qurılma bolıp, sonnan úshewi “Salamatlıq-3” joybarı sheńberinde alınǵan. Qalǵan 19 qurılma, jumsaq inventar hám stomatologiyalıq instrumentler xojalıq esabındaǵı bólim qarjıları esabınan satıp alınǵan. Gumanitarlıq járdem qorı tárepinen berilgen 2 videograftıń birewi rentgen kabinetine ornatılıp, nátiyjeli jumıs alıp barmaqta.
Házirgi waqıtta poliklinikada 30 shıpaker miynet etpekte. Olardıń 11 joqarı kategoriyalı, 3ewi birinshi kategoriyalı, 4ewi ekinshi kategoriyalı. Sonday-aq, 7 stomatolog joqarı kategoriyaǵa ie. Xojalıq esabındaǵı bólimde 7 tis shıpakeri jumıs alıp barmaqta.
Mákeme Qaraqalpaqstan medicina universiteti stomatologiya fakulteti ushın oqıw bazası esaplanadı. Bul jerde studentlerge ámeliy hám teoriyalıq sabaqlar ótkeriledi. Sonday-aq, 2-sanlı Abu Ali Ibn Sina atındaǵı jámiyetlik salamatlıq texnikumınıń tis texnigi qánigeligi ushın da ámeliy sabaqlar shólkemlestiriledi.
Baspasóz ánjumanında sanlı sistemanıń engiziliwine de ayrıqsha toqtap ótildi. Poliklinikada jıl basınan DMED sisteması iske qosılǵan bolıp, barlıq kabinetler kompyuter menen támiyinlengen. Jámi 52 xızmetker IT baǵdarında oqıtılıp, sertifikat alǵan. Jıl dawamında 8 márte medicinalıq keńes ótkerilgen, shıpakerler arasında 13, orta medicina xızmetkerleri arasında 30 oqıw shınıǵıwları shólkemlestirilgen.
Poliklinikada balalarǵa tislerdi emlew hám alıw, awız boslıǵı silekey qabatı keselliklerin emlew, bet-jaq tis qatarları anomaliyaların emlew, sonday-aq, mektep oqıwshıları arasında profilaktikalıq jumıslardı alıp barıw sıyaqlı stomatologiyalıq járdemler kórsetiledi.
Kelgen nawqaslardıń analizi sonı kórsetedi, múrájatlardıń 50 procenti tis qattı toqımalarınıń kesellikleri, 21 procenti tis aldırıw, 15 procenti awız boslıǵı silekey qabatı kesellikleri, 6 procenti bet-jaq anomaliyaları menen baylanıslı. Qosımsha xanalarǵa 21 procent balalar qatnawı dizimge alınǵan.
Sonday-aq, xojalıq esabındaǵı bólim qarjıları esabınan 18 dana zamanagóy stomatologiya úskenesi komplekti hám poliklinika mebeli satıp alınıp, balalar xızmetine baǵdarlanǵan.
Baspasóz ánjumanınıń juwmaǵında atap ótilgenindey, balalardıń salamatlıǵın qorǵaw, olarǵa sapalı hám zamanagóy stomatologiyalıq xızmet kórsetiw poliklinika jámáátiniń tiykarǵı wazıypası bolıp qalmaqta.
Konferenciyadan soń qatnasıwshılar bólimlerdegi balalardı emlew ushın jaratılıp atırǵan sharayatlar menen tanısıp, qánigelerden ózlerin qızıqtırǵan sorawlarǵa juwap aldı.
Qaraqalpaqstan Respublikası Densawlıqtı saqlaw ministrliginiń Málimleme xızmeti
