Ózbekstan Jurnalistler awqamı Qaraqalpaqstan bólimi hám Qaraqalpaqstan Respublikası Densawlıqtı saqlaw ministrligi tárepinen tarawda júz berip atırǵan waqıyalardı keń jámiyetshilikke jaqınnan tanıstırıw maqsetinde, ǵalaba xabar quralları xızmetkerleri ushın Respublikalıq qan quyıw stanciyasına press-tur shólkemlestirildi.
– Stanciya 1971-jılı shólkemlestirilgen bolıp, 1993-jılı joybar tiykarında qurılǵan eki qabatlı imaratta jaylasqan, – deydi Respublikalıq qan quyıw stanciyası bas shıpakeri wazıypasın atqarıwshı Gulzar Abdurahmanova. – Búgingi kúnde bul jerde 21 shıpaker hám 66 miyirbiyke jumıs alıp barmaqta. Sońǵı jılları joqarıda atap ótilgen nızam hám qararlar tiykarında, sırt mámleketler menen birge islesiwge ayrıqsha itibar qaratılıp, tarawǵa jańa zamanagóy medicinalıq texnologiya hám úskeneler alıp kelinbekte. Atap aytqanda, Ózbekstan Respublikası Densawlıqtı saqlaw ministrliginiń baslaması menen Qurama Shtatlar Milliy yadrolıq qáwipsizlik basqarması (NNSA), sonday-aq, Radiciyalıq qáwipsizlik byurosı (ORS) menen birgelikte qandı qayta islewde avtomat nurlanıw texnologiyalarınan paydalanıwdı qollap-quwatlaw boyınsha birgeliktegi joybar ámelge asırıldı.
Usı joybar tiykarında Respublikalıq qan quyıw stanciyasına 2022-jıl mart ayında eki jıllıq biypul texnikalıq hám kepillik xızmeti menen sırt mámleketlerden (AQSh, Belarus mámleketleri) qan kletkaların rentgen-nurlandırıw ushın 350 mıń AQSh dollarlıq Oraylıq Aziyada birden-bir RS3400 rentgen apparatı ornatılıp, 40 000 dana nurlanıw indikatorları alıp kelindi.
Sonday-aq, Ózbekstan Respublikası Prezidentiniń 2022-jıl 9-avgusttaǵı “Respublikada qan menen islesiw xızmeti mákemeleriniń jumısın bunnan bılay da jetilistiriw hám xalıq arasında biyǵárez donorlıq háreketin xoshametlew ilajları haqqında”ǵı PQ-348-sanlı qararı tiykarında 2024-jıl dawamında oraylasqan halda 1 refrijerator centrifuga, 1 PCR apparatı, IXLA analizatorı, 1 plazmoferez apparatı hám qan alıw ushın 3 donorlıq kresloları menen támiyinlendi.
Bunnan tısqarı, 2022-2023-jıllarda 6 milliard 300 million sumlıq zárúr medicinalıq apparatlar, yaǵnıy plazmoferez apparatları, mikserler, IFA analizatorları, gemoglobinometrler, plazma separatorları, -86oC suwıtqıshlar, muzlatqıshlar, tez kontaktlı shok apparatı, hár bir laboratoriya bólmesine kondicionerler hám basqa da medicinalıq ásbap-úskeneler alıp kelinip tolıq úskenelendi.
Sonday-aq, Prezidentimizdiń usı qararı tiykarında bándirgisimizge ISUZU HC40 markalı (mobil kompleks) avtobus alıp kelindi. Onda tayarlanǵan bul kóshpeli donorlıq kompleksleri arnawlı krovat, muzlatqısh, hawanı tazalawǵa mólsherlengen antibakterial lampalar, kondicioner hám jaqtılandırıw úskeneleri menen tolıq úskenelengen bolıp, onda bir waqıttıń ózinde 3 donordan qan alıw imkaniyatı bar.
Búgingi kúnde respublikamızdaǵı Joqarı oqıw orınları, barlıq shólkemler, qala hám rayonlardaǵı mákemelerde donorlardan mobil topar járdeminde kóshpeli sharayatta qan alıw jumısları alıp barılmaqta.
Sonıń menen birge, húrmetli Prezidentimizdiń joqarıda atı atalǵan qararı tiykarında, xalıqqa kórsetiletuǵın transfuziologiyalıq járdem sapasın jaqsılaw maqsetinde, sonday-aq, ayrıqsha jaǵdaylarda zárúrlik ushın rezerv sıpatında saqlaw jumısların dawam ettiriw ushın Respublikalıq qan quyıw stanciyası aymaǵında laboratoriya bólimleri ushın qosımsha imarat qurıw rejelestirilgen.
Ilajda jurnalistler stanciya bólimlerinde alıp barılıp atırǵan jumıslar menen jaqınnan tanısıp, búgingi kúnde keń jámiyechilikti qızıqtırıp kiyatırǵan sorawlarǵa juwaplar aldı.
