Qaraqalpaqstan Respublikası Densawlıqtı saqlaw ministrliginiń Málimleme xızmeti tárepinen Respublikalıq balalar stomatologiya poliklinikasına ǵalaba xabar quurallarınıń wákilleri ushın baspa sóz konferenciyası shólkemlestirildi.
Respublikalıq balalar stomatologiya poliklinikası Nókis qalası hám barlıq rayonlardan emleniw ushın kelgen balalarǵa stomatologiyalıq járdem kórsetedi. Poliklinika bir kúnde 250 balanı qabıllaw múmkinshiligine iye bolıp, onda emlew bólimi, xirurgiyalıq hám basqa da kabinetler bar. Poliklinikada Tashkent MPI Nókis filialınıń stomatologiya isi fakultetiniń oqıw bazasında studentlerine ámeliy hám teoriyalıq sabaqlar da ótiledi.
Atap ótilgenindey, tistiń nawqas bolıwınan saqlaw bala waqtınan baslanıwı kerek. Respublikalıq balalar stomatologiya poliklinikasına kelgen nawqaslardıń 50 procenti tis qattı toqımalar keselligi menen, 21 procenti tisin aldırıw ushın, 15 procenti awız quwıslıǵı silekey qabatınıń keselligi menen, 6 procenti bet-jaq tis qatarlarınıń anomaliyası, 21 procenti basqa da kesellikler menen keledi eken.
Xojalıq esabındaǵı bólimdi shólkemlestiriwdegi maqset – balalarǵa kórsetilip atırǵan stomatologiyalıq xızmetti qosımsha qárejet tabıw menen jetilistiriw hám poliklinikanı házirgi zamanǵa say rekonstrukciyalaw, zamanagóy ásbap-úskeneler, stomatalogiyalıq jumsaw materialların satıp alıw, xızmetkerlerdiń miynet haqısın qosımsha byudjetten tısqarı tabılǵan qárejetler esabınan kóbeytiw bolıp esaplanadı.
Házirgi waqıtta poliklinikada Ózbekstan Respublikası Prezidentiniń 2024-jıl 5-sentyabrdegi «Mámleketlik medicinalıq qamsızlandırıw mexanizmlerin engiziwge qaratılǵan ilajlar haqqında»ǵı qararına tiykarlanıp jumıslar alıp barılmaqta.
Konferenciyadan soń qatnasıwshılar bólimlerdegi balalardı emlew ushın jaratılıp atırǵan sharayatlar menen tanısıp, qánigelerden ózlerin qızıqtırǵan sorawlarǵa juwap aldı.
Qaraqalpaqstan Respublikası Densawlıqtı saqlaw ministrliginiń Málimleme xızmeti
