Sońǵı jılları elimizde densawlıqtı saqlaw sistemasın modernizaciyalaw, medicinalıq mákemelerdi zamanagóy talaplarǵa muwapıq tárizde jańalaw hám shıpakerler ushın qolaylı miynet sharayatların jaratıwǵa ayrıqsha itibar qaratılmaqta.
Usı maqsette Aziya rawajlanıw banki hám Aziya infrastrukturalıq bankiniń jeńilletilgen qarız qarjıları esabınan Qaraqalpaqstan Respublikası AIJSqa qarsı gúresiw orayında qurılıs – ońlaw jumısları alıp barıldı.
Ózbekstan Respublikası Prezidentiniń 2022-jıl 18-mart kúni ótkerilgen densawlıqtı saqlaw tarawı wákilleri menen “Medicinadaǵı reformalar – insan qádiri ushın” atamasındaǵı ashıqtan-ashıq sóylesiwi sheńberinde belgilengen wazıypalardıń orınlanıwın támiyinlew, sonday-aq, AIV infekciyasınıń aldın alıw, oǵan diagnoz qoyıw hám emlew sapasın bunnan bılay da arttırıw, xalıq arasında AIV infekciyasın anıqlaw boyınsha tekseriwlerdiń qamtıp alıwın arttırıw, nawqaslarǵa sapalı medicinalıq hám ruwxıy-sociallıq járdem kórsetiw, olardı zárúr dári-dármaqlar menen tolıq támiyinlew jáne sociallıq qorǵawdı kúsheytiw belgilengen edi.
Usı Strategiyaǵa muwapıq ilajlardı ámelge asırıw maqsetinde Densawlıqtı saqlaw ministrligi Ekonomika hám qarjı ministrligi menen birgelikte 2023-2027-jıllarda Mámleketlik byudjet qarjıları, AIJS, tuberkulyoz hám bezgekke qarsı gúresiw boyınsha Globallıq qor qarjıları, Aziya rawajlanıw banki jáne Aziya infrastrukturalıq investiciyalar bankiniń qarız qarjıları esabınan xalıq arasında AIV infekciyasın erte anıqlaw, diagnoz qoyıw hám emlew sapasın arttırıw maqsetinde test-sistemaların hám retrovirusqa qarsı qurallardı satıp alıw, AIJSqa qarsı gúresiw orayları hám olardıń rayonlararalıq diagnostika laboratoriyalarınıń materiallıq-texnikalıq bazasın rawajlandırıw, qánigelerdiń bilim hám kónlikpelerin arttırıw, keńnen úgit-násiyatlaw jumısların ótkeriw, sonday-aq, basqa da shólkemlestiriw ilajları ushın qarjılar ajıratıldı.
Mine usı tiykarda oraydıń 1-qabatı hám jer tólesinde qurılıs – ońlaw jumısları alıp barılıp, puqaralarǵa kórsetiletuǵın xızmet sapası jáne de arttırıldı. Búgingi kúnde orayda nawqaslar ushın barlıq qolaylıqlar jaratılǵan – tazalıqqa, qolaylı ortalıqqa hám zamanagóy úskenelerge ayrıqsha itibar qaratılǵan. Bul bolsa, álbette, ruwxıy salamatlıq hám nátiyjeli emleniw ushın áhmiyetli faktor esaplanadı.
