Búgin xabar bergenimizdey, bir topar buxaralı shıpakerler Qaraqalpaqstan Respublikası Xojeli rayonına xalıqqa medicinalıq tekseriw ótkeriw, salamat turmıs tárizin úgit-násiyatlaw hám qıyın xirurgiyalıq ámeliyatlarda járdem beriw maqsetinde jetip kelgen edi.

Búginnen baslap delegaciya aǵzaları Xojeli rayonında óziniń ámeliy jumısın basladı. Qánigeler jergilikli bilimlendiriw mákemelerine kirip, oqıwshılar arasında salamat awqatlanıw mádeniyatı, gigiena qaǵıydalarına ámel etiw, zıyanlı ádetlerdiń aldın alıw, sport penen turaqlı shuǵıllanıw sıyaqlı temalarda úgit-násiyat ilajların ótkermekte.

Bunnan tısqarı, medicina xızmetkerleri tárepinen rayondaǵı oraylıq emlewxana hám basqa da medicina mákemelerinde xalıqqa mólsherlengen keń kólemli medicinalıq tekseriwler, sonıń ishinde, kardiologiyalıq, endokrinologiyalıq, pediatriyalıq hám basqa da qánigelesken tekseriwler alıp barılmaqta. Zárúr jaǵdaylarda quramalı diagnoz qoyıw processleri de shólkemlestirilmekte. Sonday-aq, buxaralı xirurglerdiń qatnasıwında bir qatar quramalı xirurgiyalıq operaciyalar da tabıslı orınlanbaqta.

Qánigelerdiń aytıwınsha, bul ámeliy járdem tek ǵana nawqaslardıń salamatlıǵın tiklewge emes, al xojelili shıpakerleri menen óz-ara tájiriybe almasıwǵa da xızmet etpekte. Sapar dawamında Buxara wálayatı densawlıqtı saqlaw sisteması wákilleri aymaqtaǵı medicina mákemeleriniń imkaniyatların, bar talapların hám xalıqtıń salamatlıq jaǵdayın úyrenip, keleshekte ámelge asırılatuǵın qosımsha joybarlar boyınsha da usınıslar islep shıqpaqta.

Bul baslama Buxara wálayatınıń Xojeli rayonına biriktirilgeni sheńberinde ámelge asırılıp atırǵan ámeliy birge islesiwdiń jáne bir áhmiyetli basqıshı bolıp esaplanadı.