Elimizde xalıqtıń salamatlıǵın bekkemlew, ásirese, analıqtı hám balalıqtı qorǵaw mámleketlik siyasat dárejesindegi tiykarǵı baǵdarlardan biri bolıp esaplanadı. Bul baǵdarda ámelge asırılıp atırǵan profilaktikalıq ilajlar, úgit-násiyat jumısları hám ámeliy seminarlar xalıqtıń medicinalıq mádeniyatın arttırıwǵa, keselliklerdiń aldın alıwǵa xızmet etpekte.
Usı maqsette usı jıldıń 16-mart kúni “Salamat ana hám salamat bala” súreni astında profilaktikalıq akciya sheńberinde Tashkent qalasında ótkerilgen seminar sheńberinde respublika boylap keń kólemli seminarlar shólkemlestiriw belgilengen.
Búgin, Qaraqalpaqstan Respublikası Densawlıqtı saqlaw ministrligi májilisler zalında temaǵa baylanıslı seminar shólkemlestirildi.
Onda rayonlıq hám qalalıq medicina birlespeleri basshılarınıń analıq hám balalıq máseleleri boyınsha orınbasarları, aǵa miyirbiykeler, patronaj akusherler belsene qatnastı.
Seminar dawamında analıq hám balalıq salamatlıǵın qorǵaw, hámiledar hayallar hám balalardı patronaj baqlawǵa alıw, erte diagnostika hám profilaktika máselelerine ayrıqsha itibar qaratıldı. Sonday-aq, zamanagóy medicinalıq qatnaslar, ámeliyatta qollanılıp atırǵan aldınǵı usıllar hám xalıq penen nátiyjeli qarım-qatnas júrgiziw kónlikpeleri dodalandı.
Bul seminar tek ǵana medicina xızmetkerleriniń kásiplik mamanlıǵın arttırıw emes, al xalıq arasında salamat turmıs tárizin qáliplestiriwge de xızmet etpekte. Sebebi, salamat ana hám salamat bala – jámiyettiń bekkem tiykarı, elimiz kelesheginiń isenimli kepili bolıp esaplanadı.
Sol sebepli bunday profilaktikalıq ilajlar hám oqıw seminarların turaqlı túrde ótkerip barıw, medicinalıq xızmetlerdiń sapasın bunnan bılay da arttırıw hám xalıqtıń salamatlıǵın bekkemlewde úlken áhmiyetke iye.
Seminar sońında, analıqtı hám balalıqtı qorǵaw, xalıqtıń salamatlıǵın bekkemlew, salamat turmıs tárizin úgit-násiyatlaw baǵdarında alıp barıp atırǵan nátiyjeli jumısı, pidayı miyneti hám profilaktikalıq ilajlarda belsene qatnasqanı ushın bir qatar patronaj akusherkalar Ózbekstan Respublikası Densawlıqtı saqlaw ministrligi tárepinen «Minnetdarshılıq» penen sıylıqlandı.
