Qaraqalpaqstan Respublikası aymaqlıq balalar medicinalıq reabilitaciya orayında Densawlıqtı saqlaw ministrligi tárepinen ǵalaba xabar qurallarınıń wákilleri ushın baspa sóz konferenciyası shólkemlestirildi. Dáslep orayda baspa sóz konferenciyası ótkerilip, onda qatnasıwshılarǵa usı oray direktorı G.Nazarımbetova tárepinen orayda ámelge asırılıp atırǵan jumıslar haqqında keń túrde maǵlıwmatlar berildi.
Qaraqalpaqstan Respublikası aymaqlık balalar medicinalıq reabilitaciya orayı Ózbekstan Respublikası Prezidentiniń 2022-jıl 7-iyuldegi «Qaraqalpaqstan Respublikasında 2022-2024-jıllarda xalıqtıń salamatlıǵın qorǵawdı jáne de kúsheytiw haqqında”ǵı qararına muwapıq shólkemlestirilgen bolıp, 2023-jıldıń 21-fevralınan baslap Qaraqalpaqstan Respublikası boyınsha sozılmalı keselligi hám mayıplıǵı bar 18 jasqa shekemgi balalarǵa medicinalıq reabilitaciyalıq xızmet kórsetip kelmekte. Oray 120 orınǵa mólsherlengen bolıp, tórt bólimnen, atap aytqanda, hár biri 30 orınlıq travmatologiya, pulmonologiya, nevrologiya hám kardiorevmatologiya bólimlerinen ibarat.
Oraydıń tiykarǵı wazıypalarınıń biri 18 jasqa shekemgi mayıp hám nawqas balalardıń jasaw sharayatın jaqsılaw, sonıń menen birge, densawlıǵın qayta tiklew (reabilitaciya) arqalı emlew, mayıplılıqtıń aldın alıw, keselliklerdiń profilaktikası hám medicinalıq reabilitaciya boyınsha joqarı texnologiyalarǵa tiykarlanǵan qánigelestirilgen járdemge mútájlikti qanaatlandırıwdan ibarat. Usı wazıypalardı ámelge asırıw maqsetinde orayda zamanagóy medicinalıq ásbap-úskeneler menen támiyinlengen laboratoriya, fizioterapiya bólimleri shólkemlestirilgen, tar taraw qánigelerinen ibarat otolaringolog, okulist, psixoterapevt, stomatologlar jumıs islemekte.
Qaraqalpaqstan Respublikası boyınsha búgingi kúnde 18 jasqa shekemgi balalar sanı 676485ti, solardan mayıplılıǵı bolǵan balalardıń sanı 11683ti hám sozılmalı keselligi bar balalar sanı 33527 ni quraydı. Qaraqalpaqstan Respublikası aymaqlıq balalar medicinalıq reabilitaciya orayında 2024-jıl dawamında mayıplıǵı hám sozılmalı keselligi bar 3121 bala emlenip shıqqan.
Orayǵa 2024-jıl dawamında mayıplıǵı hám sozılmalı keselligi bar 3121 bala qabıl etilgen. Olardıń 528 (16,9%)in mayıplıǵı bar hám 2593 (83,1%)in sozılmalı keselligi bar balalar quraǵan.
Birlespeniń laboratoriya bólimi zamanagóy áspab-úskeneler menen támiyinlengen bolıp, onda emlewxananıń bólimlerinde stacionar sharayatta jatıp emlenip atırǵan nawqaslardan ulıwma klinikalıq (ulıwma sidik analizi, kaprologiya, yayca glist), gemotologiyalıq (ulıwma qan analizi, qannıń uyıwshılıǵı, trombocit muǵdarı), bioximiyalıq analizler (mochevina, kreatinin, ulıwma belok, glyukoza, ALT, AST, ulıwma bilirubin, kalciy, temir) alınıp, tekseriw jumısları alıp barıladı.
– Qaraqalpaqstan Respublikası Joqarǵı Keńesi Prezidiumınıń 2023-jıl 10-noyabr kúngi arnawlı qararına muwapıq, oraydı jańadan úskenelew ushın 2 milliard 270 mln sum muǵdarında qarjı ajratıldı. Usı qarjılardıń esabınan oraydıń laboratoriya bólimine 15 túrdegi medicinalıq apparatlar alındı. Atap aytqanda, EKG, UZI, sanlı rentgen, TMS, ENMG apparatları, al fizioterapiya bólimine 3 túrdegi apparat satıp alınıp, balalarǵa medicinalıq xızmet kórsetiwdiń sapası hám nátiyjesi ádewir jaqsılandı,-deydi oray direktorı G.Nazarımbetova.
Sonday-aq, “Mehirli insanlar” qorı jámááti menen birgelikte alıp barılǵan jumıslar nátiyjesinde Vashington qalasındaǵı Ózbek diasporası tárepinen berilgen qarjılay járdemniń arqasında oraydıń nevrologiya bóliminiń balalar dem alıw xanası hám LFK xanası zaman talabına say úskeneler menen támiyinlenip berildi.
Olar shved diywalshası, vertikalizatorlar, reabilitaciyalıq stul, júriw maslaması, embeklew ushın arnawlı toplam, sensorlı júriw jolı, jumsaq moduller toplamı, velotrenajyor, fitbollar, júriwdi tiklew trenajyorı balalar batuti hám t.b.
Press-turda qatnasıwshılar orayda jaratılǵan sharayatlar menen tanıstırıldı. EKG, sanlı rentgen apparatı, UFO «Solnıshko», elektroforez Zinga, darsonval, elektroforez «Potok», svetovaya vanna, sollyuks, stomatologiyalıq qurılma, UZI, TMS, ENMG apparatları ornatılǵan xanalardı kórip, onda emlenip atırǵan balalar hám ata-anaları menen sáwbetlesti.
Men Kegeyli rayonınan qızımdı emletiw ushın bul jerge jetinshi márte keliwim. Emlewxana shıpakerleri hám miyirbiykeleri qızıma jaqsı qarap atır. Házir tok penen emlew apparatına túsirip atır. Qızımnıń jaǵdayı burınǵıdan ádewir jaqsılandı. Qolları hesh nárseni sezbeytuǵın edi. Házir sezip háreket etiwge urınıp atır. Men bunnan oǵada quwanıshlıman, shıpakerlerden minnetdarshılıǵım sheksiz,-deydi G.Rawajova.
Maǵlıwmat ushın atap ótetuǵın bolsaq, reje boyınsha orayda 1 ayda 252 naӯqas bala 3396 orın kúnlerinde 13,6 kún daӯamında stacionar sharayatında emlenip shıǵıӯı kerek bolsa, 2024-jıl daӯamında 3121 (104%) naӯqas bala 40354 (98,2%) orın kúnlerinde 12,9 (94,9%) kún daӯamında stacionar sharayatında emlenip shıqkan.
Press-tur dawamında qatnasıwshılar ózlerin qızıqtırǵan sorawlarǵa juwap aldı.
QR Densawlıqtı saqlaw ministrligi
Málimleme xızmeti
