Ózbekstan Respublikası Densawlıqtı saqlaw ministriniń orınbasarı F.R.Sharipov, Ózbekstan Respublikası Densawlıqtı saqlaw ministrligi Medicinalıq qamsızlandırıw basqarmasınıń baslıǵı Shuhrat Almardanov hám Mámleketlik medicinalıq qamsızlandırıw qorı atqarıwshı direktorınıń birinshi orınbasarı Sh.Inoyatovlar tárepinen Qaraqalpaqstan Respublikası medicina mákemelerinde medicinalıq qamsızlandırıw mexanizmlerin ámelge asırıwda alıp barılıp atırǵan ilajlar, medicina mákemelerin sanlastırıw, medicinalıq xızmetlerdiń sapası hám kólemin úyrendi.
Úyreniw nátiyjesi boyınsha Qaraqalpaqstan Respublikası Densawlıqtı saqlaw ministrliginde videokonferencbaylanıs túrinde ótkerilgen májiliste aymaqtaǵı taraw basshılarınıń qatnasıwında áyne usı máseleler hár tárepleme kórip shıǵıldı.
Ilajda, sonday-aq, Qaraqalpaqstan Respublikası Densawlıqtı saqlaw ministrligine qaraslı barlıq rayonlıq medicina birlespeleriniń basshıları orınlardaǵı studiyalar arqalı qatnastı.
Bunda tiykarǵı itibar kepillengen paketke kirgizilgen 66 túrdegi dári quralları, medicinalıq buyımlar, jumsaw materialları, laboratoriyalıq tekseriwler ushın zárúr reaktivler menen támiyinlewi, diagnostikalıq-analizler ushın zárúr bolǵan úskeneler menen támiyinleniw jaǵdayına qaratıldı.
Xalıqtıń densawlıǵı menen baylanıslı kórsetkishlerin monitoring etiw, kesellik tariyxın júrgiziw hám medicina mákemelerine jiberiw maqsetinde ámelge asırılıp atırǵan sanlastırıw processleri, tiyisli baǵdarlamanıń jumıs nátiyjeliligi bahalandı.
Respublikalıq qánigelestirilgen ana hám bala salamatlıǵı ilimiy-ámeliy medicina orayı mámleketlik mákemesiniń Qaraqalpaqstan Respublikası filialında “hár bir emlengen jaǵday” usılında Qor tárepinen qarjılandırılǵan bolsa da, nawqaslardı emlew procesinde tiykarsız qárejetler bolǵanlıǵı ashınarlı.
Nókis qalalıq medicina birlespesinde shólkemlestirilgen Oraylıq laboratoriya xızmetiniń shólkemlestiriw jumısları aqırına shekem alıp barılmaǵanlıǵı, laboratoriya kurerleri RW qan úlgileri ushın óz aldına termosumkalar menen támiyinlenbegenligi sınǵa alındı.
Laboratoriya hám OP arasında DMED elektron sisteması jolǵa qoyılǵan bolsa da, laboratoriyaǵa alıp kelingen analizler sanı menen elektron sistema arasında ayırmashılıq júzege keliwi aqıbetinde, analizler esabın júrgiziwde anıqsızlıq keltirip shıǵarǵanlıǵı aytıp ótildi.
Respublikalıq kóp tarmaqlı medicina orayında jeńilletilgen jollama menen emlengen nawqaslardıń kesellik tariyxı zárúr dárejede júrgizilmegenligi anıqlanǵanlıǵı atap ótildi.
Ózbekstan Respublikası Prezidentiniń 2024-jıl 5-sentyabrdegi PQ-311-sanlı qararına muwapıq, Reimbursaciya baǵdarlaması 2025-jıl 1-aprelden baslap Qaraqalpaqstan Respublikası boyınsha tolıq engizilip, búgingi kúnge shekem jámi 38 Farmacevtika jumısı menen shuǵıllanıwshı isbilermenlik subektleri menen shártnamalar rásmiylestirilgen.
Usı qarardıń orınlanıwın támiyinlew maqsetinde Ózbekstan Respublikası Ministrler Kabinetiniń hám Densawlıqtı saqlaw ministrliginiń arnawlı buyrıǵı tastıyıqlanıp, oǵan tiykar 11 túrdegi reimbursaciya baǵdarlaması tiykarında biypul beriletuǵın dári-dármaqlarınıń sanı 29 ǵa arttırıp berildi.
Biraq, xalıqtı bul sistemaǵa tartıw hám olardı biypul dári-dármaqlar menen támiyinlewde bir qatar medicina mákemeleri tárepinen nemquraydılıqqa jol qoyılıp atırǵanı atap ótildi.
Sonday-aq, ilajda respublikadaǵı unamlı jaǵdaylar da kórsetip ótildi.
Májiliste keltirilgen kemshiliklerdi saplastırıw boyınsha anıq wazıypalar belgilep alındı.
QR Densawlıqtı saqlaw ministrligi
Málimleme xızmeti.
