Respublikalıq qıstawlı medicinalıq járdem ilimiy orayı Qaraqalpaqstan filialındaǵı simulyaciyalıq oqıw orayında medicinalıq xızmet kórsetiwdiń sapasın arttırıw, jas qánigelerdiń ámeliy kónlikpelerin rawajlandırıw maqsetinde gezektegi oqıw-shınıǵıwları shólkemlestirildi.

Sheberlik sabaǵında reanimatolog hám xirurgiyalıq baǵdardaǵı tájiriybeli shıpakerler qatnastı. Olar klinikalıq ordinatorlar ushın júrek-ókpe reanimaciyası, qáwipli jaǵdaylarda jedel hám durıs háreket etiw, zamanagóy medicinalıq úskenelerdi nátiyjeli qollanıw sıyaqlı máselelerde ámeliy shınıǵıwlar ótkerdi.

Simulyaciyalıq oraydıń joqarı texnologiyalar menen úskenelengen ortalıǵında qatnasıwshılar óz bilim hám kónlikpelerin jáne de bekkemlew imkaniyatına ie boldı. Zamanagóy simulyatorlar arqalı ómir ushın qáwipli jaǵdaylarda qalay háreket etiw, nawqasqa birinshi medicinalıq járdem kórsetiw hám qıstawlı reanimaciya processleri ámelde kórsetildi.

Klinikalıq ordinatorlar master-klass dawamında tek ǵana teoriyalıq bilimlerdi emes, al ámeliyatqa jaqınlasqan ortalıqta real jaǵdaylar arqalı tájiriybe almasadı. Bul bolsa olardıń keleshektegi kásiplik jumısında tayarlıq dárejesin arttırıwǵa xızmet etedi.

Oqıw dawamında, júrek-ókpe reanimaciyasınıń barlıq basqıshları tolıq kórsetildi, simulyatorlar arqalı nawqastıń jaǵdayına operativ hám durıs qatnas jasaldı hám real medicinalıq úskeneler járdeminde zamanagóy texnologiyalardan paydalanıw usılları úyrenildi.

Ilajdıń tiykarǵı maqseti – jas qánigelerdiń ámeliyatqa jaqın kónlikpelerin rawajlandırıw, olardı real medicinalıq jaǵdaylarǵa tayarlaw hám jámáátlik birge islesiwdi bekkemlewden ibarat. Bunday ilajlar arqalı jas qánigeler tek ǵana bilimli emes, al tájiriybeli ámeliyachı bolıwı ushın da áhmietli qádem taslaydı.

Ilaj dawamında qatnasıwshılar qánigelerden ózlerin qızıqtırǵan sorawlarǵa juwap aldı.